DILI, 23 Juñu 2025 (TATOLI)–Ministériu Agrikultura, Pekuária, Peska no Floresta (MAPPF), segunda ne’e, asina akordu ho Empreza Xineza kona-ba konstrusaun sistema irrigasaun Irabere, Munisípiu Vikeke.
“Ami asina kontratu ba sistema irrigasaun Irabere ho orsamentu $10.714.858,26. Sistema irrigasaun ne’e kobre área rua mak hanesan Uatukarbau no Iliomar (Lautein),” Ministru Agrikultura, Pekuária, Peska no Floresta, Marcos da Cruz informa ba jornalista sira iha Komoro.
Ministru ne’e haktuir katak prosesu konkursu ba konstrusaun ne’e hala’o liuhusi Komisaun Nasionál Aprovizionamentu.
Governante ne’e esplika, sistema irrigasaun ho naruk kilómetru 9,2 no fornese bee ba rai ektare 478. Konstrusaun sei hala’o durante tinan rua, hahú iha tinan ida-ne’e no to’o 2027.
Tuir ministru katak, rai ektare 118 pertense ba estasaun Uatukarbau no ektare 350 pertense ba estasaun Iliomar.
“Ita sei haruka dokumentu kontratu ne’e ba Tribunál Konta hodi halo revizaun no aprovasaun,” nia afirma.
Iha fatin hanesan, Diretór Filiál Korporasaun Konstrusaun Internasionál Chingquing, Wang Maoyang, haktuir Empreza Chingquing kle’ur ona hala’o servisu iha área konstrusaun iha Timor-Leste hodi kontribui ba dezenvolvimentu infraestrutura no ekonomia nasaun nian.
“Ami hakarak halo buat ne’ebé di’akliu hodi harii irrigasaun Irabere no garante kualidade konstrusaun irrigasaun nian,” nia promete.
Responsavel ne’e garante katak konstrusaun ne’e sei ramata tuir tempu ne’ebé determinadu ona.
Jornalista: Felicidade Ximenes
Editór: Xisto Freitas da Piedade
