PN ratifika akordu izensaun vistu entre Timor-Leste no Malázia
DILI, 23 Juñu 2025 (TATOLI) – Parlamentu Nasionál (PN) ratifika akordu izensaun vistu entre Governu Timor-Leste no Malázia ho rezultadu vota a favór 58, kontra no abstensaun laiha.
Tuir relatóriu no pareser husi Komisaun B ne’ebé trata asuntu Negósiu Estranjeiru, Defeza no Segurans, proposta rezolusaun númeru 18/VI/2a-ratifika akordu troka nota diplomátika, entre Governu Timor-Leste no Governu Malázia, relativa izensaun obrigasaun vistu ba fin turístiku ba titulár pasaporte diplomátiku, ofisiál ou serbisu no ordináriu.
Konsidera roteiru ba adezaun nu’udar membru plenu ba Asosiasaun Nasaun Sudeste Asiátiku (ASEAN, sigla inglés) reflete espesifikamente nesesidade rekoñesimentu mútua pasaporte entre Estadu-membru organizasaun no vontade husi parte, aprofunda mós relasaun ezistente no fasilita interkámbiu turístiku entre parte sira, liuhusi konsesaun izensaun vistu ba ninia titulár hodi tama no estadia turístika até loron 30.
Konsidera mós determinasaun país iha implementa no kumpre ho instrumentu hotu ASEAN, Governu solisita Parlamentu ratifika ba prezente proposta ne’e.
Iha diskusaun ne’e marka mós prezensa husi Vise-Ministra ba Asuntu ASEAN, Milena Rangel.
Ratifikasaun ba akordu ida-ne’e ho objetivu atu hametin liután relasaun ne’ebé iha ona, fasilita interkámbiu turístiku entre parte rua no kumpre kompromisu sira ne’ebé Timor-Leste asume ona iha ámbitu prosesu adezaun plena ba ASEAN.
Notísia relevante: PN sei ratifika akordu izensaun vistu ba tipu pasaporte hotu entre TL no Malázia
Jornalista: Nelson de Sousa
Editora: Maria Auxiliadora
