DILI, 23 Juñu 2025 (TATOLI)–Tribunál Judisiál Primeira Instánsia Dili (TJPID), segunda ne’e, liuhusi Juiza Prosesu Julmira Auxiliadora hatún desizaun hodi absolve arguidu ADJ husi krime administrasaun danoza no pekulatu uzu ne’ebé Ministériu Públiku imputa ba arguidu.
Razaun Tribunál absolve arguidu ADJ husi krime ne’e tanba la prenxe krime administrasaun danoza no krime pekulatu uzu.
Nia esplika, bainhira Tribunál konfirma tiha faktu sira-ne’ebé sasin vendedór ida husi merkadu Taibessi aprezenta mai Tribunál, momentu ne’ebá, sasin deklara katak durante ne’e sira (vendedór) uza duni hariis -fatin ne’ebé iha merkadu Taibesi. Maibé, hafoin sira uza tiha hariis-fatin ne’e, ho sira nia inisiativa rasik sira kontribui osan.
Juiza Julmira fundamenta katak osan sira-ne’ebé vendedór sira selu ba utilizasaun hariis-fatin iha merkadu Taibessi momentu ne’ebá arguidu ADJ uza filafali ba nesesidade jestaun merkadu nian. Tanba ne’e, Tribunál konsidera katak arguidu ADJ la uza osan ne’e ba nia aan rasik.
“Ho nune’e, Tribunál deklara katak faktu sira-ne’ebé hateten katak arguidu uza osan sira-ne’e ba nia aan rasik, la provadu. Tan ne’e, Tribunál deklara absolve arguidu ADJ husi krime administrasaun danoza no krime pekulatu uzu,” Juiza Julmira Auxiladora deklara iha sala audiénsia julgamentu, TJPID, Kaikoli.
Rekorda fali katak arguidu ADJ nu’udár pesoál jestaun merkadu Taibessi, akuzadu ba krime Administrasaun danoza no pekulatu uzu.
Tuir akuzasaun Ministériu Públiku katak arguidu halo asaun ne’e iha tinan 2017, hodi halo kobransa ba vendedór sira katak sé mak uza hariis-fatin ne’ebé lokaliza iha merkadu Taibessi tenke selu dolar ida no osan sira-ne’ebé mak arguidu kolleta la halo relatóriu no arguidu la hatama bá kofre Estadu Autoridade Munisípiu Dili nian.
Ho hahalok arguidu ADJ nian ne’e, Autoridade Munisípiu Dili prosesa kedas nia (arguidu) bá Tribunál.
Jornalista: Natalino Costa
Editór: Xisto Freitas da Piedade
