DILI, 23 Juñu 2025 (TATOLI)–Tribunál Judisiál Primeira Instánsia Dili (TJPID), segunda ne’e, kontinua halo julgamentu ba kazu José Bernardo ne’ebé mate iha sela Komandu Polísia Nasionál Timor-Leste (PNTL), Kaikoli, Dili, iha 2022.
Iha faze produsaun prova, Tribunál kontinua rona depoimentu husi sasin polísia ho inisiál FSG.
Iha sala julgamentu, sasin deklara katak iha setembru 2022, nia hanesan membru polísia iha Eskuadra Vera-Krúz iha sesaun patrullamentu. Momentu ne’ebá, nia simu keixa husi matebian Gaudencio nia bin katak nia alin hetan baku husi José Bernardo no agora baixa hela iha ospitál.
Notísia relevante: PTR Carmona kontinua hola-parte juíz koletivu halo julgamentu ba kazu José Bernardo
Nia haktuir katak momentu ne’ebá hafoin nia simu tiha keixa husi Gaudencio nia bin, nia informa kedas kazu ne’e bá Komandante Eskuadra no Komandante Eskudra fó orden katak bele kontinua prosesa kazu ne’e.
Nune’e, iha momentu ne’ebá kedas sei loron hela nia ho ekipa Patrullamentu Eskuadra Vera-Krúz bá foti José Bernardo iha nia uma.
FSG deklara momentu ne’e nia bá duni José Bernardo nia uma iha área Audian, besik Estádiu Munisipál Dili. Momentu nia bá husu José Bernardo, nia inan mak iha ne’ebá ko’alia ho nia no nia mak husu katak sé José Bernardo iha karik bolu mai atu submete ba prosesu investigasaun.
Sasin tenik, momentu ne’e José Bernardo sai husi uma laran mai iha li’ur, nia haree la tau faru nune’e nia haruka José Bernardo tau tiha faru. Nia (matebian) koopera ho polísia nune’e nia ho nia inan hamutuk ho Gaudencio nia bin no sasin ba Eskuadra Vera-Krúz.
Sasin hateten bainhira to’o tiha Eskuadra Vera-Krúz, sasin entrega José Bernardo ba iha Investigadór AA hodi hahú submete ba prosesu investigasaun.
Sasin konfensa ba Tribunál katak sasin la iha koñesimentu ba José Bernardo nia mate.
Hafoin rona tiha depoimentu husi sasin, Tribunál Kolletivu liuhusi Juíz José Eskurial halo kedas adiamentu ba kazu referidu ba iha 01 Jullu 2025 tuku 10:30 Otl hodi prosede ba julgamentu.
Audiénsia julgamentu ne’e prezide husi juíz koletivu kompostu husi José Eskurial, Afonso Carmona no Francisco Cabral, arguidu sira hetan asisténsia husi Defensór Públiku Estaquio Guterres, Henrique Maris no Juvinal Yenes, enkuantu José Bernardo (matebian) hetan asisténsia husi defeza Elídio no Adelina.
Jornalista: Natalino Costa
Editór: Xisto Freitas da Piedade
