VIKEKE, 23 Juñu 2025 (TATOLI)—Xefe suku Afalokai, postu administrativu Uatulari, munisípiu Vikeke, Cesario N. Pires, klarifika kona-ba materiál kontrusaun ba obra Programa Nasionál Dezenvolvimentu Suku (PNDS) hanesan simente ne’ebé sai fatuk ne’e, impaktu husi klíma udan no anin,
Notísia Relevante: Autoridade Uatulari lansa projetu loke estrada rurál kilométru 8 bá aldeia lima
“Simente sira-ne’e sai fatuk ne’e impaktu husi klíma husi udan no anin, tanba ne’e ami-nia simente agora sai fatuk hotu. Iha momentu ami halo distribuisaun simente ba fatin konstrusaun obra iha foho ne’e, depois iha foho akontese udan beibeik, entaun karreta labele asesu to’o iha fain kontrusaun. Tan ne’e, mak anin no udan kona simente balun ne’e sai fatuk hotu. Simente ne’ebé iha totál hamutuk saku 200 ne’e, saku 80 mak balun sai fatuk ba daudaun,” Cesario N. Pires hateten ba Afência TATOLI, iha postu Uatulari, ohin.
Nia hatutan, kondisaun estrada liga ba fatin implementasaun obra ne’e, bainhira tempu udan ne’e karreta labele asesu estrada, entaun momentu distribuisaun simente ba hatun de’it iha dalan mak lalin ba uma.
“Uma ne’ebé rai materiál simente iha okos ne’e mós kondisaun ladun di’ak, entaun iha tempu udan no anin kona simente de’it sai fatuk. Agora, simente sei rai iha ne’ebá. Bainhira udan ne’e para, ami sei esforsu uza simente sira-ne’e konstrui ba baleta, moru protesaun no ponte ki’ik,” nia dehan.
Projetu PNDS ba suku Afaloikai husi tinan 2024 ne’e ninia implementasaun to’o agora daudaun ne’e ninia progresu kontrusaun estrada rurál ne’e, atinje ona 83% maibé ninia difikulade mak udan no anin ne’e mak projetu refere seidauk konklui.
“Bázeia ba orsamentu aloka ba ami-nia suku ne’e, iha matadalan ami labele implementa obra iha ne’eba, maibé durante ne’e estrada sai difikuldade ba komunidade ne’ebé hela iha área rurál. Tanba ne’e mak ami deside implementa obra loke dalan ba komunidade atu asesu. Maske ami hasoru difikuldade, ami kontinua esforsu hodi konklui obra referida,” nia dehan.
Entretantu, estrada ne’ebé suku Afaloikai hahú loke iha aldeia Kaitau to’o aldeia Lari ne’e hamutuk kilómetru ualu (8) plus metru 300 (8+300), ho totál gastu orsamentu hamutuk $48,000.00 ne’ebé implemeta hahú husi Agostu 2024.
Diretór PNDS munisípiu Vikeke, Francsco Soares Varela, haktuir PNDS servisu suku ka komunitária ne’ebé liuhusi autoridade ida-idak presiza tau matan tuir matadalan PNDS haruka.
“Fasilitadór tékniku, finansa no sosiál postu nian, sei fasilita prosesu tuir matadalan maibé desizaun husi konsellu suku. Nune’e, servisu ne’ebé prolema hanesan simente sai fatuk, la selu badaen ne’e ba projetu 2024 ba kotuk. Orsamentu 2024 ba kotuk devolve fila-fali ba kofre Estadu ne’e mós sai problema ida. Tan ne’e. ha’u husu para ita hotu-hotu ne’ebé iha suku presiza tau matan ba programa ne’e. Tanba, programa referida mai husi komunidade mak deside. Prioridade komunidade mak deside, osan suku mak jere, desizaun suku mak foti,” nia hateten.
Tanba ne’e, nia husu sidadaun ne’ebé hola parte iha suku ne’e presiza kontribui ba nia suku bainhira haree hahalok ne’ebé ladi’ak mosu, no liuhusi autoridade suku ida-idak no postu administrativu hodi buka solusaun.
Notísia Relevante: Autoridade Uatulari lansa projetu reabilitasaun estrada rurál husi Nunumlau bá Iraler
Jornalista : Vitorino Lopes da Costa
Editór : Cancio Ximenes
