DILI, 24 Juñu 2025 (TATOLI) – Primeiru-Ministru (PM), Xanana Gusmão, akompaña husi Ministru Obra Públika (MOP), Samuel Marçal, halo observasaun direta ba atividade normalizasaun estrada diresaun Glenu bá to’o postu administrativu Letefoho, munisípiu Ermera. Atividade obervasaun ne’e halo iha 23 Juñu 2025.
Tuir dokumentu ne’ebé Tatoli asesu, bainhira to’o iha suku Goulolo, populasaun balun ho estudante sira konsentra iha sede suku hodi simu xefe Governu no hato’o agradesimentu tanba normalizasaun estrada ne’e fasilita tebes movimentu komunidade.
Primeiru-ministru enkoraja populasaun atu hein prosesu hothotu ne’ebé daudaun la’o hela no projetu konstrusaun estrada bá postu administrativu ne’e sei to’o duni iha fulan balun tan.
“Daudaun prosesu konstrusaun estrada Glenu mai Letefoho la’o hela, tanba tenke haree didi’ak, halo uluk estudu ba buat barak molok implementa. Tenke haree didi’ak ninia kualidade, kalkulasaun bá distánsia no alokasaun orsamentu, tanba osan ne’e povu nian. Maibé atu dehan ba imi katak, estrada husi Glenu sei mai duni to’o Letefoho”, Xanana hateten.
Iha oportunidade ne’e primeiru-ministru husu ba populasaun atu kolabora ho Governu bainhira implementa projetu konstrusaun estrada ne’e iha tempu balun mai.
Iha fatin hanesan Xefe Planeamentu Ministériu Obra Públika (MO), Tito Edgar, hateten MOP halo ona normalizasaun ba estrada husi Glen bá to’o Letefoho tanba ezijénsia husi populasaun, liuliu atu fasilita movimentu transporte públiku.
Ho ezijénsia populasaun ne’e maka Ministru Obra Públika, Samuel Marçal, husu rasik ba primeiru-ministru atu halo normalizasaun no Xefe Governu mós konkorda katak tenke halo duni, nune’e provizoriamente bele fasilita movimentu transporte públiku hodi he’in prosesu konkursu públiku ba konstrusaun nian.
Nia esplika Governu deside halo uluk normlizasaun hanesan ateru rai tanba haree kondisaun grave tebes. Ho razaun ida-ne’e maka halo uluk normalizasaun hodi hein prosesu konkursu públiku ne’ebé daudaun iha Komisaun Nasionál Nasionál Aprovizionamentu (CNA, sigla portugés) durante fulan ualu seidauk konklui.
Xefe Planeamentu MOP ne’e dehan prosessu normalizasaun la’o lais tebes, tanba durante iha terrenu ekipa traballu hetan akompañamentu direta no korazen husi Ministru Obra Públika.
Nune’e mós Padre Pároku Nossa Senhora do Carmo Letefoho, Élio Pereira Fernandes, observa katak komunidade kontente tebes ho normalizasaun estrada ne’e.
Pároku ne’e louva no agradese ba Governu liuhusi Ministru Samuel Marçal ne’ebé tun direta hodi akompaña ekipa durante tempu tomak no normalizasaun ne’e la’o lais tebes.
“Ida-ne’e hatudu katak governante ne’e iha duni vontade ba kompromissu atu responde ba preokupasaun populasaun iha área rurál. Populasaun mós kontente ho esperansa boot ba Governu katak,sei implementa duni projetu konstrusaun estrada tama to’o Letefoho”, padre hateten.
Normalizasaun ne’e hahú kedan husi Glenu bá Humboe, Eraulu, tama to’o Letefoho ho totál kilómetru 38 ne’ebé tuir planu sei konklui iha loron rua tan.
Prosesu normalizasaun ne’e, ekipa traballu MOP utiliza ekipamentu husi Institutu Jestaun Ekipamentu no Apoiu Dezenvolvimentu Infrastrutura, Institutu Públiku (IGEADI, IP).
Antes ne’e, Ministru Obra Públika infoma ba Tatoli katak nia parte esforsu husu CNA atu prosesa lalais, nune’e projetu ne’e bele implementa, tanba orsamentu ba projetu ne’e mai husi fundu empréstimu.
“Ha’u mós hakarak projetu ne’e implementa lalais, maibé ita hotu hatene buat hotu la’o tuir sistema entaun ida-ne’e afeta oituan, maibé sei implementa iha tempu badak”, konklui.
Notisía relevante: Konstrusaun estrada husi Gleno bá Letefoho hahú iha tinan ne’e
Jornalista: Arminda Fonseca
Editora: Maria Auxiliadora
