DILI, 15 Abríl 2025 (TATOLI) – Ministériu Obra Públika planeia, iha tinan ne’e, halo konstrusaun ba estrada husi Gleno bá to’o postu administrativu Letefoho, munisípiu Ermera.
Ministru Obra Públika, Samuel Marçal, hateten ba konstrusaun ne’e nia prosesu daudaun iha ona Ajénsia Dezenvolvimentu Nasionál (ADN) hodi haree kustu ba projetu ne’e hafoin Komisaun Nasionál Aprovizionamentu (CNA) lansa konkursu ba públiku.
Projetu konstrusaun estrada ne’e nia orsamentu mai husi fundu empréstimu, ne’ebé aprova ona husi Konsellu Administrasaun Fundu Infraestrutura (KAFI) iha fulan kotuk.
Iha sorin seluk, Ministru Planeamentu no Investimentu Estratéjiku, Gastão de Sousa, hateten orsamentu ne’ebé tinan ne’e prevee ba KAFI hamutuk millaun $310,75 no ba fundu impréstimu hamutuk millaun $50,29.
“Tinan ne’e mós ita aprova ona projetu konstrusaun estrada husi Gleno bá Letefoho husi fundu empréstimu hamutuk millaun $40-resin”, dehan.
Notísia relvante: Estrada diresaun Gleno-Letefoho-Atsabe grave, autoridade lokál husu governu nia intervensaun
Lembra katak Deputada Bankada Governu husi Congresso Nacional da Reconstrução Timorense (CNRT), Cedelízia Farria dos Santos, foin lalais ne’e husu ba Governu atu hadi’a estrada husi Gleno bá Letefoho no Ermera Antiga.
“Hakarak levanta kestaun estrada iha munisípiu Ermera, ne’ebé kada loron piór. Notísia ne’ebé ita akompaña iha estrada Ermera husi Gleno bá Letefoho, Atsabe no mós estrada Hatulia kontinua ho kondisaun ladi’ak”, dehan.
Tanba ne’e, deputada ne’e husu katak bainhira mak projetu ne’e sei implementa.
Notísia relvante: Deputada CNRT husu Governu tau atensaun estrada Gleno bá Letefoho-Ermera Antiga
Jornalista: Arminda Fonseca
Editora: Maria Auxiliadora
