AINARU, 24 Juñu 2025 (TATOLI) – Ministru Agrikultura, Pekuária, Peska no Floresta (MAPPF), Marcos da Cruz, no Prezidente Autoridade Munisípiu Ainaru, Manuela Corte-Real, halo lansamentu ba kolleta hare ne’ebé kuda iha natar ektare 100 iha Fatunaru, suku Kasa, postu administrativu Ainaru Vila, munisípiu Ainaru.
Ministru Agrikultura hateten haree ne’ebé kolleta ne’e, iha fulan tolu kotuk liubá nia rasik hamutuk ho agrikultór sira mak kuda uza mákina moderna no iha tempu kolleta mós nafatin uza mákina moderna.
“Antes ita koko uluk ko’a uza tudik ka sabit hafoin uza fali mákina moderna. Ida-ne’e hatudu katak Governu kontinua buka moderniza iha setór agrikultura, liuliu hasa’e produsaun hare”, Marcos da Cruz hateten iha Fatunaru, ohin.
Nia esplika katak mákina moderna ne’e bele uza ba ko’a hare, hamoos no hatama kedas hare ba karón laran. Ida-ne’e atu fasilita agrikultór sira no hakmaan sira-nia serbisu ho manuál durante ne’e.
Mákina moderna ne’ebé Governu apoia ba munisípiu Ainaru hamutuk hitu mak hanesan mákina fila-rai, kuda no ko’a.
“Hafoin ita fahe mákina moderna ba agrikutór sira iha munisípiu hotu, inklui Ainaru haree katak komunidade barak mak entuziazmu tanba natar barak mak antes ne’e abandona, agora hahú uza fali ona”, nia dehan.
Governante ne’e salienta katak haree ne’ebé kolleta ne’e, nia parte koordena ona ho Sentru Lojístika Nasionál (CLN, sigla portugés) hodi sosa.” Ho ida-ne’e ita husu agrikultór sira kontinua kuda filafali hare depoizde kolleta”.
Nia mós husu ba agrikultór sira nafatin kuidadu mákina sira bainhira uza hotu tau iha mahon, nune’e bele ajuda sira-nia ba tempu naruk nian.
Xefe grupu Buitiris, Alfredo Pereira, hateten agradese tebes ba Governu tanba disponibiliza ona mákina moderna ba sira, ne’ebé bele halo produsaun hare. “Hothotu hatene depoizde ukun-an atu halo natar uza karau mak halai, maibé agora mákina moderna iha ona no falisita tebes atividade agrikultór nian”, nia lembra.
Tuir nia, mákina moderna sira ne’e bele hakmaan serbisu iha terrenu hodi hasa’e produsaun hare nian, nune’e bele kontribui ba merkadu nasionál.
Nia dehan mákina moderna sira ne’ebé Governu apoia ba grupu agrikultór ne’e utiliza tuir regra mak hanesan grupu agrikultór ka indivíduu ne’ebé uza hodi bá kolleta hare tenke hatama $10. Objetivu mak atu halo manutensaun ba mákina bainhira avaria.
Prezidente Autoridade Munisípiu Ainaru, Manuela Corte-Real, dehan ho prezensa Ministru Agrikultura nian iha suku Kasa ida-ne’e fó motivasaun ba agrikultór sira atu badinas liután serbisu iha área ne’e hodi hasa’e produsaun iha rai-laran.
Iha atividade lansamentu kolleta hare ne’e marka prezensa mós husi Komandante Polísia Nasionál Timor-Leste Munisípiu Ainaru, Superintendente Asistenste Polísia Luís da Silva, reprezentante Sustainable Agriculture Productivity Improvement Project (SAPIP) iha Timor-Leste, autoridade postu administrativu sira, xefe suku Kasa no agrikutór sira.
Jornalista: Arminda Fonseca
Editora: Maria Auxiliadora
