MSSI ezekuta ona pursentu 18 iha OJE 2025
DILI, 24 Juñu 2025 (TATOLI)–Ministériu Solidariedade Sosiál no Inkluzaun (MSSI), ezekuta ona pursentu 18 hosi Orsamentu Jerál Estadu (OJE) 2025 iha fulan-Maiu liubá.
“Ita ezekuta ona pursentu 18, to’o fulan-Maiu ne’e maibé iha trimestre dahuluk ita hetan de’it 6.1% tanba programa lubuk ida mak ita la konsege inklui bolsa da mae kondisionál ne’ebé Jullu agora ne’e atu halo pagamentu”, Diretór Jerál Servisu Koorporativu iha MSSI, Fernando dos Reis, dehan ba TATOLI iha MSSI, tersa ne’e.
Nia dehan hosi pursentu 18 ezekuta ba programa Institutu Solidariedade Sosiál (ISS) inklui programa sira seluk hanesan bolsa da mae kondisionál.
“Ita gasta ona osan miliaun $4-resin inklui ba Institutu Solidariedade Sosiál, ne’ebé mak ita transfere ona miliaun $1.4 no mós ba saláriu vensimentu, bens estar”, nia dehan.
Governu aprova $26,188.602 iha proposta Orsamentu Jerál Estadu (OJE) 2025 hodi kontinua fó prioridade ba programa serbisu no atendimentu sosiál ba povu.
“OJE 2025 ami-nian $26.188.602 hodi aloka ba saláriu vensimentu $3,982,088, beins no serbisu $10,744,951, transferénsia públika $9,501,672, kapitál menór rihun $500 no kapitál dezenvolvimentu $1,459,891. Ami iha programa prioridade rua mak ida (1) dezenvolvimentu instituisionál no rua (2) serbisu no atendimentu sosiál,” Ministra Solidariedade Sosiál no Inkluzaun (MSSI), Verónica das Dores, hatete.
Notísia relevante: MSSI relata ezekusaun orsamentu trimestre dahuluk nian ba Komisaun C
Jornalista : Osória Marques
Editora : Rita Almeida
