DILI, 24 Juñu 2025 (TATOLI)–Komisaun Antí Korrupsaun (CAC-sigla portugéza), tersa ne’e, bolu governante ho inisiál EdSC iha Sekretaria Estadu Igualdade no Inkluzaun hodi submete ba investigasaun tanba suspeitada envolve iha kazu falsifikasaun orsamentu viajen ba munisípiu 13.
EdSC marka prezensa iha edifísiu Komisaun Antí Korrupsaun Faról ne’e nia estatutu hanesan arguida ba kazu referidu no to’o to’o iha CAC tuku 8:30 Otl akompañadu husi nia advogadu privadu estranjeiru ida.
Governante ne’e mai iha CAC hodi presta deklarasaun ho nia karreta privada ho xapa matríkula 14.016 A.
Hafoin to’o tiha iha edifísiu CAC, governante ne’e hakat tama ba sala espera CAC nian hodi hein minutu balun. Hafoin hein tiha minutu balun, funsionáriu CAC lori tama bá sala investigasaun hodi submete ba prosesu investigasaun.
“Komisaun Antí Korrupsaun bolu governante iha Sekretaria Estadu Igualdade no Inkluzaun ho NUC 0034/24.PGCC,” sita husi komunikadu imprensa ne’ebé TATOLI asesu husi CAC.
Governante ne’e submete ba prosesu investigasaun iha CAC durante oras rua nia laran, hahú 8:30-11:15 Otl.
Ba kazu ne’e, Komisaun Antí Korrupsaun molok ne’e iha sesta (20/6), bolu ona atuál Diretór Jerál Sekretaria Estadu Igualdade no Inkluzaun no Koordenadór Mídia SEII ho inisiál P hodi presta deklarasaun iha Komisaun Antí Korrupsaun, Faról.
Jornalista: Natalino Costa
Editór: Xisto Freitas da Piedade
