DILI, 23 Juñu 2025 (TATOLI)—Prezidente Tribunál Rekursu, Afonso Carmona hateten Tribunál Rekursu (TR) prevee millaun $4-resin atu konstrui Tribunál Primeira Instánsia iha munisípiu tolu hanesan Bobonaru, Ermera no Vikeke.
“Prosesu ba instalasaun ba Tribunál Judisiál Primeira Instánsia iha munisípiu tolu mak hetan ona aprovasaun iha Konsellu Administrasaun Fundu Infraestrutura. Konstrusaun Tribunál Judisiál Primeira Instánsia ne’ebé hetan ona aprovasaun mak hanesan Ermera, Bobonaru no Vikeke. Sira-nia orsamentu ne’e ho estimasaun orsamentu ne’e hamutuk millaun $4-resin,” Carmona hateten ba jornalista sira iha TJPID, Kaikoli, segunda ne’e.
Carmona esplika, dezeñu ba obra ne’e konkluidu ona no ninian konstrusaun sei hahú iha tinan ne’e.
“Empreza ba dezeñu ha’u lahatene no empreza ne’ebé atu kaer obra ne’e mós ha’u la lembra maibé atu dehan katak projetu ne’e hetan ona aprovasaun no ha’u atu bá vizita para haree nia konstrusaun atu la’o oinsá. Entaun, ha’u atu dehan de’it katak projetu ne’e sei realiza, tanba ne’e kontratu. Kuandu sé mak halo projetu ne’e la tuir kontratu, nia sei hetan konsekuénsia,” nia afirma.
Tuir nia, tuir loloos, tinan ne’e planu konstrui Tribunál Judisiál Primeira Instánsia iha Munisípiu tolu ne’e la’o dala ida, maibé prefere konstrusaun Tribunál Primeiru Instánsia Ermera no Maliana mak sei halo uluk iha tinan ida-ne’e.
Nia dehan, molok harii Tribunál foun sira-ne’e, Prezidente Tribunál Rekursu ne’e koordena ona ho parte téknika sira atubele halo vizita hodi halo observasaun bá fatin konstrusaun edifisiu Tribunál foun iha Munisípiu Ermera no Bobonaru liuliu iha Maliana ne’ebé sei halo instalasaun ba Tribunál foun.
“Ha’u foin tama. Ha’u husu sira halo uluk rua lai mak Maliana no Ermera. Tan ne’e mak ha’u bolu sira para ami atu tun vizita nia andamentu oinsá. Tanba ne’e, ha’u seiduak bele informa klaru, tanba ha’u seidauk vizita direta, entaun presiza vizita direta,” nia haktuir.
Prezidente Tribunál Rekursu ne’e mós sente katak ba projetu ne’e iha difikuldade iha parte téknika, maibé husi tékniku sira seidauk esplika klaru ba nia kona-ba prosesu instalasaun Tribunál foun.
Tan ne’e, nia ho inisiativa rasik sei bá halo vizita direta bá fatin instala Tribunál Judisial Primeira Instánsia foun sira hanesan Munisípiu Ermera, Bobonaro no Viqueque.
Jornalista: Natalino Costa
Editór: Xisto Freitas da Piedade
