OEKUSI, 25 Juñu (TATOLI) – Ekipa husi Providória Direitu Umanu no Justisa (PDHJ), Rejiaun Administrativa Espesiál Oekusi Ambeno (RAEOA), kuarta ohin, hala’o formasaun hodi hasa’e koñesimentu ba Konsellu Suku sira iha suku Costa, sub-rejiaun Pante Makasar kona-ba promove no proteje direitu umanu no promove governasaun di’ak hodi hametin integridade iha sosiedade.
Diretora Interina PDHJ BA Delegasaun Territoriál Oekusi, Domingas da Paixão Quefi, formasaun ne’e hala’o durante loron tolu hahú iha tersa 24 Juñu sei remata iha loron kinta 26 Juñu 2025 ho tema “Hasa’e koñesimentu lideransa komunitáriu kona-ba promove no proteje direitu umanu no promove governasaun di’ak hodi hametin integridade iha sosiedade”.
Notísia relevante:PDHJ Oé-Cusse rejista kazu violasaun boa-governasaun hitu
“Atividade programa husi nasionál nian atu sira-nia koñesimentu tanba sira mak besikliu komunidade sira, oinsá atu rona komunidade sira-nia preokupasaun atu ita-bele hato’o mai iha PDHJ, atubele halo rekomendasaun ba instituisaun kompetente, oinsá bele hakonu ema hotu sira-nia direitu, bainhira akontese violasaun direitu umanu no violasaun boa-governasaun,”nia afirma.
Kona-ba kazu liga tema ne’e bainhira akontese kazu ruma iha sosiedade, dalaruma komunidade direita hato’o keixa ba PDHJ, maibé bainhira PDHJ rona isu violasaun direitu umanu no violasaun boa-governasaun, entaun PDHJ halo fiskalizasaun direita.
Notísia relevante:PDHJ partilla prinsípiu boa governasaun hodi kombate korrupsaun iha Oé-Cusse
Iha fatin hanesan Xefe Suku Costa, Francisco Colo, konsidera formasaun loron tolu ne’e di’ak tebes tanba bele hasa’e koñesimentu ba lideransa komunitáriu Costa nian, oinsá atu promove no proteje direitu umanu no proteje mós boa-governasaun di’ak ho integridade ba iha sosiedade.
“Ha’u mak hakarak mai fasilita formasaun tanba ami balun seidauk iha koñesimentu, itabele hatene tanba tuir lei suku númeru 9/2016 iha artigu 5, atribui responsabilidade barak hanesan promove rezolusaun ba konflitu no disputa sira-ne’ebé mosu iha komunidade, promove mós bem-estar ka kondisaun moris di’ak komunidade, servisu hamutuk ho orgaun no servisu husi administrasaun públika no mós promove sósiu-ekonómiku, entaun formasaun durante loron tolu, ami sente tulun tebes ami hanesan autoridade suku,” nia orgullu.
Tan ne’e nia, rekomenda ba parte PDHJ atu kontinua habelár tan formasaun ba suku no aldeia sira seluk iha sub-rejiaun Oésilo, Pássabe no Nítibe inklui suku balu iha Pante Makasar.
Notísia relevante:PDHJ observa Ospitál Referénsia Oé-Cusse laiha problema ba ai-moruk no atendimentu
Jornalista: Abílio Elo Nini
Editór: Florencio Miranda Ximenes
