DILI, 25 Juñu 2025 (TATOLI)—Portavóz Komandu Polísia Nasionál Timor-Leste (PNTL), Superintendente Polísia João Belo dos Reis hateten polísia detein suspeitu na’in-hitu ne’ebé envolve iha grupu Naukteen Króniku (NAKRO).
Suspeitu na’in-hitu ne’ebé envolve iha grupu NAKRO ne’e suspeitadu sobu loja ida iha área Fatuhada, iha-ne’ebé foti-subar telefone iha loja laran iha segunda (16/6), nune’e ekipa konjunta kompostu husi Servisu Informasaun Polísia, Servisu Informasaun Militár, Servisu Nasionál Intelejénsia (SNI) bainhira simu informasaun katak akontese kazu foti-subar iha loja laran, ekipa konjunta referida halo kedas servisu rápidu hodi kaptura suspeitu hirak-ne’e no agora detein ona iha sela Komandu Polísia Eskuadra Dom Aleixo.
Detensaun ne’ebé polísia halo ba suspeitu na’in-hitu ne’e bazeia ba mandadu judisiáriu ho NUC 0413/2025. Suspeitu na’in-hitu ne’e ho inisiál DGJ, YGKS, Ka Edi, SF, DP, ASG, ADV.
“Suspeitu sira-ne’e halo krime bebeik. Hafoin sai husi komarka halo nafatin krime no bainhira hetan libertasaun husi Tribunál sira kontinua komete krime. Suspeitu sira-ne’e hamutuk na’in-sia, na’in-rua helik aan hela enkuantu na’in-hitu mak polísia detein,” nia informa ba jornalista sira iha nia kna’ar fatin, Kuartél Jerál PNTL, Kaikoli, kuarta ne’e.
Belo hateten, polísia kontinua buka-tuir suspeitu na’in-rua hodi responsabiliza ba sira-nia hahalok tanba polísia tenke garante nasaun ida-ne’ebé seguru.
Nia husu ba inan-aman sira atu kuidadu oan sira no husu mós ba komunidade ein-jerál, autoridade lokál sira atu koopera ho polísia hodibele informa karik identifika atu ka krime ruma akontese iha ita-boot sira-nia área,” nia konklui.
Jornalista: Natalino Costa
Editór: Xisto Freitas da Piedade
