DILI, 25 Juñu 2025 (TATOLI)–Ekipa konjunta kompostu husi Sekretaria Estadu Asuntu Toponímia no Organizasaun Urbana (SEATOU), Ministériu Obra Públika (MOP) no Polísia Nasionál Timor-Leste (PNTL) hahú mobiliza eskavatór rua hodi hamamuk espasu iha Lurumata, aldeia 03 no 05 ba alargamentu estrada.
Alargamentu estrada sei hahú husi sede Komité Sentrál FRETILIN (CCF, sigla portugés) to’o tasi-ibun Embaixada Amérika, ho totál luan metru 15 metru, husi parte liman loos metru 7,5 no parte liman karuk metru 7,5 no ninia naruk metru 840, nune’e estrada nbele iha espasu ba bee dalan no pedestre.
Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, nia prezensa hamutuk ho ekipa iha terrenu atu halo kontinuasaun ba programa IX Governu, ba alargamentu estrada iha Lorumata, ne’ebé antes ne’e halo ona sosializasaun iha fulan-lima liubá.
“Ita-nia populasaun hotu iha ne’e prontu atu koopera. Entaun, iha semana rua liubá ita mai fó ona avizu ba komunidade afetadu atu sobu rasik sira-nia uma ne’ebé tau markasaun no iha semana ida-ne’e ekipa Ministériu Obra Públika ho kompañia sira bele halo ona sira-nia serbisu,” Sekretáriu Estadu informa ba jornalista sira iha área Lurumata, Kuarta ne’e.
Notísia relevante : Komunidade afetadu alargamentu estrada iha Lorumata hahú sobu ida-idak nia uma
Tanba ne’e, SEATOU hamutuk ho ekipa konjunta mai hodi fó apoiu nune’e serbisu bele la’o ho di’ak. Ekipa uza mákina rua husi Institutu Jestaun Ekipamentu no Apoiu ba Dezenvolvimentu Infraestrutura, Instututu Públiku (IGEADI, I.P) nian, hafoin kompañia mak sei kontinua halo serbisu ida-ne’e.
“Aleinde ne’e, verifikasaun dadus la’o hotu ona, tanba ne’e komunidade afetadu ida-idak sobu sira-nia uma atu rai materiál konstrusaun ba futuru maibé bainhira afetadu balun labele sobu, maka mákina sei apoiu halo serbisu,” Sekretáriu Estadu tenik.
Alargamentu estrada ne’e hodi ajuda ema hotu ne’ebé asesu ba estrada bele iha alternativa.
“Ha’u hanoin semana oin estrada ne’e bele luan ona no sira bele raut sai foer sira lori bá fatin ne’ebé MOP hatudu ba kompañia sira,” governante ne’e katak.
Verifikasaun ba levantamentu dadus
Tékniku Servisu Resentamentu MOP, Samuel Dani soares, hateten, ekipa responsável halo ona verifikasaun ba levantamentu dadus ba komunidade afetadu sira no elabora ona dadus nune’e hein de’it aprovasaun.
“Bainhira dadus sira-ne’e aprova hotu ona maka ami sei informa ba Xefe suku ho avizu ba ninia komunidade hodi taka sai lista ida-idak iha sede suku hodi halo pagamentu. Maibé komunidade ne’ebé hakarak halo reklamasaun bele halo no sira-ne’ebé hakarak asina termu aseitasaun mós bele. Tanba iha afetadu na’in-neen iha Lorumata mak seidauk hatama dokumentu to’o agora,” Samuel Dani, katak.
Iha sorin seluk, Xefe suku Fatuhada, Marcelino Belo, hateten, durante ne’e nia parte sempre halo sosializasaun ba komuidade hodi sobu rasik sira-nia uma atu aproveita materiál sira, nune’e komunidade mós koopera ho Governu.
“Iha komunidade balun mak seidauk submete dokumentu to’o agora, kuaze na’in-neen hanesan ne’e, maibé prosesu alargamentu kontinua la’o no ida-ne’e la impede atividade Governu ba dezenvolvimentu,” Autoridade lokál ne’e reforsa.
Iha uma 39 mak afetadu ba alargamentu estrada iha aldeia 03 no uma 33 afetadu iha aldeia 05.
Afetadu alargamentu estrada, Maria Fernandes, rekoñese, sira-nia parte hetan benefísiu husi projetu alargamentu estrada ne’e.
“Ida-ne’e di’ak mai ami komunidade hodi asesu ba estrada ne’ebé mak di’ak. Ne’ebé ami koopera ho Governu hodi sobu uluk ona ami-nia sasán iha semana rua liubá. Ami submete ona dokumentu sira hanesan kartaun eleitorál, ficha família no konta bankária ba parte responsável sira ne’ebé atende kona-ba prosesu indenizasaun,” nia tenik.
Tuir observasaun jornalista nia iha terrenu, nota katak komunidade koopera ho ekipa hodi rekolla sasán sira tuir nia fatin.
Jornalista : Alexandra da Costa
Editora : Julia Chatarina
