BAUKAU, 25 Juñu 2025 (TATOLI)—Sentru Saúde Vemasse Tasi, Postu Administrativu Vemasse, Munisípiu Baukau, rejista pasiente maioria sofre moras Infesaun Respiratória Aguda (ISPA).
Xefe Interinu Sentru Saúde Vemasse Tasi, António Pereira, esplika durante inísiu tinan ne’e to’o trimestrál daruak pasiente ne’ebé halo tratamentu hamutuk 3.790 no ne’ebé sofre moras ISPA ho totál 1.064.
“Moras ne’ebé aas liu iha-ne’e mak ISPA, nia kauza primeiru iklima, tanba agora bailoron rai-rahun mak afeta liubá komunidade,” Xefe Sentru Saúde Vemase Tasi hateten iha ninia kna’ar fatin, kuarta ne’e.
António salienta, kauza moras referida impaktu husi mudansa klimátika ne’ebé maihusi rai-rahun inklui estilu moris husi komunidade hanesan konsume bee, ne’ebé maioria sei konsume bee direta husi torneira.
Sentru Saúde referida kontinua esforsu hamutuk ho ekipa voluntária hodi halo promosaun saúde no akonsolamentu ba komunidade husi suku to’o baze tanba komunidade maioria seidauk iha koñesimentu kona-ba halo prevensaun saúde.
“Estoke ai-moruk sufisiente hela. Ita nafatin hala’o servisu tuir protokolu no matadalan ne’ebé ministériu iha,” António Pereira haktuir.
Husi númeru moras ne’ebé rejistadu, aleinde ISPA, Sentru Saúde referida rejista mós tipu moras seluk hanesan moras kulit hamutuk na’in-187, scabies 10, pneumonia 14, reumátika 1, tee-been 168, gastritis 162, bronkitis 5 no anemia na’in-rua.
Entretantu, Sentru Saúde Vemasse Tasi hala’o atendimentu ba komunidade husi suku tolu ho aldeia ualu ho totál pesoál saúde na’in-29.
Jornalista: Natalino Belo
Editór: Xisto Freitas da Piedade
