DILI, 26 Juñu 2025 (TATOLI) – Grupu Feto Parlamentár Timor-Leste (GMPTL, sigla portugés) aprezenta projetu Lei Traballadór Doméstiku ba Komisaun D ne’ebé trata Asuntu Ekonomia no Dezenvolvimentu.
“Lei ne’e GMPTL mak sai proponente no ami halo ona diskusaun uitoan hodi haree asuntu ne’e”, Prezidente Komisaun D, Ricardo Baptista, informa ohin.
Nia lembra katak iha lejizlatura anteriór, Komisaun D aprezenta inisiativa projetu lei referidu no hala’o ona audénsia públika, maibé la konsege hotu nune’e kaduka tiha.
Tuir deputadu ne’e, atu hamosu Lei Traballadór Doméstiku presiza haree mós situasaun sosiál no kultura iha Timor-Leste, tanba dalaruma situasaun la hanesan ho nasaun sira seluk.
“Tanba traballadór doméstiku ita-nia hanesan ema mai ne’e hela iha família, ita fó tiha saláriu $115 ou $150, mais nia hela hamutuk ho uma-na’in hanesan família mak halo serbisu”, nia dehan.
Prezidente Komisaun D ne’e salienta katak, antes hamosu lei ne’e presiza koordena didi’ak ho parte Ezekutivu hodi haree ninia impaktu sira bainhira lei ida-ne’e tama iha implementasaun.
“Di’ak liu aprezenta husi Governu mak lori mai Parlamentu atu diskute. Importante lejizlasaun presiza tuir realidade iha ita-nia rai”, nia realsa.
Nune’e, Komisaun D ho GMPTL komunika hela Governu atu haree lejizlasaun ne’e hodi halo diskusaun di’ak liután hodi avansa ba prosesu tuirmai.
Antes, ne’e deputada CNRT, Cedelízia Farria dos Santos, husu Governu atu kria Lei Traballadór Doméstiku hodi projete traballadór rai-laran ne’ebé hala’o serbisu iha uma-kain sira.
Notísiarelevante: SEFOPE prepara Ezbosu Lei Traballadór Doméstiku
Jornalista: Nelson de Sousa
Editora: Maria Auxiliadora
