DILI, 25 Juñu 2025 (TATOLI)—Ministru Defeza, Donaciano Costa Gomes “Pedro Klamar Fuik”, kuarta ne’e, fó pose ba Kargu Xefia sira iha Konsellu Administrasaun Institutu Defeza Nasionál (IDN).
Iha eventu ne’e, Nuno Manuel Corvelho simu pose nu’udár Diretór Ezekutivu Interinu ba Institutu Defeza Nasionál (IDN) hodi substitui Diretór Ezekutivu Interinu IDN sesante, Guilherme de Jesus da Costa Soares, Kapitaun Fragata Nicolau Sousa Guterres asumi kna’ar Diretór Ensinu Formasaun IDN hodi troka Kapitaun Fragata Duarte Borges Loe no Josefa dos Reis Gonçalves hodi asumi Diretora Jerál Jestaun no Rekursu IDN.
Ministru Defeza, Donaciano Costa Gomes hateten serimónia toma posse ne’e nesesidade urjente ida hodi bele konkretiza efetivamente ba dezenvolvimentu no transformasaun IDN ba Institutu Ensinu Superiór Defeza Nasionál ne’ebé define tuir objetivu sira-ne’ebé estabelese husi IX Governu Konstitusionál.
“Ohin, imi hahú jornada profisionál foun ida ho termu responsabilidade ne’ebé imi presiza kumpri ba Estadu-Nasaun, públiku ein-jerál no mós ba kolega sira husi órgaun seluk ne’ebé dependénsia ba IDN no Ministériu Defeza. Ida-ne’e oportunidade ida-ne’ebé teste ita-boot sira-nia kompeténsia, kapasidade no integridade atu serbí iha kuadru kultura organizasionál,” Pedro Klamar Fuik hateten iha nia deskursu ne’ebé Tatoli asesu husi mídia Ministériu Defeza.
Governante ne’e husu emposadu sira atu servisu ho profisionál no responsabilidade perante Estadu no nasaun no públiku ein-jerál.
Klamar Fuik mós hato’o nia agradesimentu kle’an ba estrutura anteriór ba servisu hotu ne’ebé sira presta tiha ona ba IDN.
“Fiar katak empeñamentu, dedikasaun no profisionalizasaun ne’ebé estrutura tuan demonstra tiha ona sei lembra ba nafatin husi kolega sira iha Institutu Defeza Nasionál,” sita husi komunikadu ne’e.
Iha ámbitu pose ne’e, Ministru Defeza atribui sertifikadu rekoñesimentu ba Diretór Interinu sesante IDN nian, Guilherme de Jesus da Costa Soares no mós Kapitaun Fragata Duarte Borges Loe nu’udár onra ida ba kontribuisaun sira durante asumi pozisaun iha IDN.
Jornalista: Natalino Costa
Editór: Xisto Freitas da Piedade
