BOBONARU, 26 Juñu 2025 (TATOLI)—Primeiru-Ministru, Kayrala Xanana Gusmão, husu ba ema hotu atu hadomi malu no hadomi ambiente tanba ambiente mak sustenta ema moris no sai hanesan ema-nia uma rasik.
Iha Jubileu ida-ne’e, Xanana Gusmão konvida sarani sira atu hanoin hikas katak bainhira kalan-kalan ferik ho katuas sira bele toba hakmatek, lahó laran ta’uk, la sente inseguru, ne’e hanesan bensaun ida.
Nia hatutan, mai hamutuk hodi hanoin hikas katak hamnasa-midar ne’ebé haree hetan iha labarik-oan sira-nia oin, ne’e hanesan esperansa boot ida, maibé atu hanoin mós katak bainhira hala’o tratamentu ho dignidade feto ida ka joven ida no sira bele hetan oportunidade, ne’e hanesan vitória ida.
Nia dehan, hanesan sarani bele halo tanba iha legadu ida, ne’ebé metin ona durante períodu rezistênsia mak domin ba ema selu, domin ba pátria no fiar-metin iha valór no iha espíritu Coração de Jesus.
“Tanba ne; e, ha’u atu diosezanu sira hotu iha Malaiana, iha selebrasaun ne’e bele saran imi-nia reflesaun ho orasaun iha misaun bootida-ne’ebé ita kontinua hala’o, mak atu servisu makaas ba konstrusaun nasionál. Mak hanesan domin ba ena seluk, mizerikordia ka laran lauk bae ma sira-ne’ebé presiza liu no perdaun ba atus no omisaun ne’ebé ofende ita,” Xefe Governu hateten ida-ne’e liuhusi diskursu iha semináriu “XV aniversáriu Dioseze Maliana ho Jubileu tinan 350 Coração de Jesus” ne’ebé realiza iha Salaun Padre Manuel Luís, Igreja Paroquial Maliana, Dioseze Maliana, kinta ne’e.
Aleinde ne’e, Xanana husu mós atu fó domin ba meiu ambiente ne’ebé sustenta ema-nia moris, ne’ebé sai hanesan ema-nia uma rasik, mak, natureza no planeta.
Xanana haktuir, Papa Francisco husik hela mensajen importantea ida ba sarani tomak iha mundu kona-ba nesesidade atu tau-matan no respeita meiu ambiente, aleinde respeita ema hotu-hotu ba futuru ida-ne’ebé prósperu no sustentável liu, hodi inspira ema hotu-hotu atu tau-matan ba ema hotu nia uma boot.
“Ne’e signifika trata natureza ho respeitu. Respeita ema ninia ekosistema terrestre no mariña. Nein sempre hatene, maibé bainhira explora irrasionalmente katak la uza kakukat, rekursu mariña no terrestre ou, ezemplu, bainhira ema soe arbiru fo’er iha rai liuliu materiák husi plástiku, ne’e kontribui daudaun ona ba destruisaun meiu ambiente terrestre no mariña no konsekuentemente ba insustentabilidade futura jerasaun,” bia dehan.
Iha Jubileu Sagrado Coração de Jesus ne’e, buat ne’ebé Xanana Gusmão husu ba ninia aan rasik mak hakarak husu mós ba sarani hotu-hotu mak umildade, bondade ho responsabilidade hodi tau-matan ba maluk sira hotu no ba ambiente.
Serbí ba ema seluk, respeita ema hotu ho natureza, kontribui hodi kria armonia ho kooperasaun iha ema ida-idak nia família no iha komunidade, signifika ema hanesan sarani kompromete ona atu sai instrumentu aá pás no amor iha mundu.
“Hanesan konkluzaun, hein katak Jubileu Sagrado Coração de Jesus ida-ne’e bele inspira ema hotu-hotu liuliu timoroan hotu hodi hakle’an fiar no moris nakonu ho amor no kompaisaun. Hein mós katak bele loke ema ida-idak nia fuan hodi halo kompromisu atu hotu-hotu sai instrumentu ba pás no amor iha mundu,” nia hateten.
Xefe Governu hakotu ho votu moris naruk ba Dioseze Maliana, atu nia kontinua leno no fó esperansa ba komunidade hotu-hotu.
Bispu Dioseze Maliana, Dom Norberto do Amaral konsidera hanesan onra boot ida ohin Dioseze Maliana simu Primeiru-Ministru, Kay Rala Xanana Gusmão no hato’o bem-vindu.
“Ohin mós, sarani Dioseze Maliana hakarak espresa ho fuan no laran tomak iha loron espesiál ida ohin ba Maun Boot nia loron espesiál ka loron moris nian ne’ebé selebra iha 20 Juñu tinan nee’ ba da-79,” Prezidente Konferénsia Episkopál Timorense ne’e hateten.
Dom Norberto ho sarani sira promete atu harohan nafatin bá Maromak, Xefe Governu Xanana Gusmão bele hetan nafatin isin di’ak hodi tau-matan nafatin ba rai doben Timor ida-ne’e.
Notisia Relevante : IX Governu Konstitusionál felisita no dejeza susesu ba Dom Leandro
Jornalista : Sergio da Cruz
Editór : Cancio Ximenes
