SMASA Vikeke menus transporte difikulta ekipa rekolla lixu iha kapitál

VIKEKE, 26 Juñu 2025 (TATOLI)—Diretór Servisu Agua no Saneamentu (SMASA) munisípiu Vikeke, Guilhermino Gomes, informa SMASA menus transporte difikulta ba ekipa servisu rekolla lixu sira iha kapitál Vikeke.

“Difikuldade ne’ebé agora daudaun ami hasoru mak menus transporte ba rekolla lixu nian. Tanba ami iha de’it karreta Carry ida mak ne’ebé oferese husi empreza Don Came husi Japaun. Nune’e durante ne’e ami uza hodi kobre raut lixu iha lixeiru unidade 15 sira iha postu Vikeke Vila,”  Guilhermino Gomes hateten ba Agência Tatoli. iha resintu administrasaun munisípiu Vikeke, ohin.

Lixeira hamutuk hamutuk unidade 15 ne’ebé kada loron komunidade so’e lixu iha uma, depois SMASA rekolla ba tau hamutuk iha armajenne’ebé lokaliza iha Sira Lari, bainhira rekolla lixu iha armajen barak ona, SMASA aluga fali karreta tula lixu sira ba Díli hodi entrega ba empreza Caltech halo resiklajen ba lixu.

“Maske ami limitasaun transporte ba rekolla lixu maibé nafatin esforsu hodi rekolla lixu sira iha kapitál Vikeke.  Nune’e, ba difikuldade menus transporte ne’e ami tau ona Planu Asaun Anuál (PAA) 2026, karik PAA ne’e liu ami sei sosa karreta hodi reforsa ami-nia servisu rekolla lixu iha munisípiu Vikeke,” nia dehan.

Aleinde ne’e, nia dehan, komunidade balun sei menus konsiénsia soe lixu iha uma lixu ne’ebé prepra ona, maibé sira ba so’e fali iha mota ninin no dalan ninin sira-ne’e.

“Problema ida ami hasoru mak ita-nia komunidade sira sei menus konxiénsia so’e lixu nian, balun ba soe iha mota ninin no dalan ninin sira. Ami planu ona atu ba halo sensibilizasaun kada aldeia no suku sira atu fó hanoin ba komunidade so’e lixu iha fatin ne’ebé ita-nia Governu prepara ona, atu ekipa SMASA bele rekolla fasil,” nia hateten.

Tuir dadus, ekipa rekolla lixu iha SMASA hamutuk na’in-ualu (8) kompostu husi feto rua (2) no mane neen (6) rekolla lixu sira iha kapitál Vikeke.

Jornalista : Vitorino Lopes da Costa

Editór        : Cancio Ximenes