DILI, 26 Juñu 2025 (TATOLI)–Tribunál Judisiál Primeira Instánsia Dili (TJPID), kinta ne’e, hasai ona desizaun iha sesta (20/6) hodi kondena arguidu ho inisiál JRX ho pena prizaun tinan 30, tanba konsidera krime ne’ebé Ministériu Públiku imputa ba arguidu provadu oho nia feen ho inisiá BJ.
Iha desizaun ne’e, Tribunál haree no tetu bazeia ba deklarasaun husi arguidu no sasin nian, no ikusmai Tribunál Koletivu deside hodi aplika pena únika tinan 30 ba iha arguidu.
Tribunál mós esplika katak kuandu parte arguidu la konkorda liuhusi nia defeza bele halo rekursu.
Tuir akuzasaun ne’ebé arrola husi Ministériu Publiku ba kazu ne’e katak arguidu JRX ho lezada BJ nu’udár feen ho la’en no sira iha oan na’in-rua ho idade sei ki’ik.
Iha loron 20 Outubru 2024, tuku 01:00 madrugada, iha Dili, ho razaun ne’ebé la klaru, arguidu hodi tudik sona lezada hamutuk dala 13 iha lezada nian kakorok dala haat, sona mós iha lezada nia liman parte loos dala ida, no arguidu lori tudik ko’a lezada nian liman parte loos besik kotu, sona tan iha lezada nia kanotak dala ida, sona iha lezada nian hirus-matan dala ida, sona iha lezada nian kalilin dala ida, sona iha lezada nian brasu parte loos dala ida, sona iha lezada nia knosen parte loos dala ida, sona iha lezada nian kotuk laran dala rua, ne’ebé rezulta lezada kanek todan.
Depoizde arguidu sona tiha lezada, arguidu mós lori tudik ne’ebé nia kaer sona fali ba nian hirus-matan dala ida, kalilin no kakorok hodi rezulta kanek.
Hafoin testemuña AJ rona lezada hakilar, nune’e testemuña halai ba haree kondisaun lezada ho arguidu ne’ebé kanek todan hotu, entaun nia halai bá estrada hakilar hodi husu ajuda, no viziñu sira rona hodi bá to’o iha fatin, no testemuña kontinua halai bá Eskuadra Polísia hodi hato’o informasaun.
Kuandu polísia to’o iha lokál akontesimentu, lezada mós iis kotu, nune’e polísia halo kedas detensaun ba arguidu no apreensaun ba objetu utilizadu.
Iha altura ne’ebá, lezada ho kondisaun grávida ho fulan hitu liu, ne’ebé predisaun katak lezada sei partu iha fulan-Dezembru. Iha kalan akontesimentu, lezada sente kanotak moras ona, nune’e halo arguidu deskonfia no hirus hodi sona lezada dala barak halo lezada mate.
Arguidu JRX komete krime ne’e ho voluntária, livre no konxientemente no ho intensaun hasai lezada nia vida. Arguidu hatene katak ninia hahalok ne’e kontra lei, maibé halo nafatin.
Konstitui arguidu JRX kanesan autór ba materiál ba konkursu krime rua, omisídiu agravadu konjuga ho violénsia doméstika no mós utiliza arma branka ne’ebé previstu no punidu tuir artigu 139 pontu G no H husi Kódigu Penál, konjuga ho artigu 3 pontu A ho 35 pontu B hotu-hotu husi Lei nú. 7/2010, fulan Jullu, Lei Kontra Violénsia Doméstika, konjuga ho artigu 2 no pontu G no mós artigu 20 númeru 1 hotu-hotu husi Lei nú. 5/2017, loron 19 Abríl, kona-ba Rejime Jurídiku Relativu Pratika Arte Marsiál Rituál Arma Branka (rama ambon) iha alterasaun Kódigu Penál.
Hatán ba akuzasaun ne’e iha sala julgamentu laran, juíz prosesu konfirma ba iha arguidu maibé arguidu la ko’alia. Tanba ne’e, Tribunál uza de’it maneira ne’ebé arguidu bele halo mak Tribunál konfirma arguidu hatún ho doko ulun.
Tribunál konfirma kona-ba motivu akontesimentu problema keta mosu suspeitadu, arguidu mós hatán. No Tribunál konfirma kona-ba sona lezada dalabarak arguidu mós rekoñese no hatán.
Arguidu mós hatudu ba Tribunál kona-ba kanek ne’ebé arguidu sona aan rasik iha parte kalilin, hirus-matan no kakorok.
Tribunál bolu arguidu hamriik iha oin hodi konfirma kona-ba fotografia husi arguidu nia feen nian, arguidu mós hamriik bá iha oin hodi haree no hamonu matan-been.
Arguidu rekoñese, oras ne’e daudaun arguidu iha oan na’in-rua mak iha hela li’ur, no hela ho família sira.
Rekorda fali katak iha faze alegasaun, Prokuradora Bemvinda do Rosário, mantein ho akuzasaun ne’ebé iha, hodi solisita bá iha Tribunál Koletivu atu aplika prizaun tinan 25 ba iha arguidu.
Enkuantu, arguidu nia defeza, Defensora Públika Laura Valente husu Tribunál atu absolve arguidu, razaun tanba bazeia ba relatóriu husi médiku hatudu katak arguidu sofre hela moras no kondisaun lahanesan ema baibain.
Defeza haree katak laiha kondisaun atu kondenan arguidu ne’ebé ho kondisaun moras hela. Tanba ne’e, ho desizaun Tribunál nian hodi kondena arguidu ho pena prizaun tinan 30, defeza la konkorda no sei halo rekursu hasoru desizaun ne’e.
Audiénsia julgamentu referidu, prezide husi Juíz Koletivu kompostu husi Argentino Nunes, Ivan Patrocínio Antoninho, Zulmira Auxiliadora, Ministériu Públiku reprezenta husi Prokuradora Bemvinda fo Rosário, arguidu hetan asisténsia legál husi Defensora Públika Laura Valente.
Jornalista: Natalino Costa
Editór: Xisto Freitas da Piedade
