DILI, 27 Juñu 2025 (TATOLI)—Ministra Saúde, Élia António de Araújo dos Reis Amaral husu ba profisionál saúde sira atu labele utiliza ekipamentu médiku Estadu nian ba klínika privada atu hetan lukru.
Nia dehan, tuir informasaun ne’ebé nia simu katak profisionál saúde balun suspeitadu foti ekipamentu médiku estadu nian lori bá klínika privada.
“Iha informasaun ne’ebé ha’u simu katak iha pesoál balun foti ekipamentu médiku Estadu nian lori bá klínika privada hodi hetan lukru. Ha’u husu labele foti no uza ekipamentu médiku no medikamentu Estadu nian lori ba klínika privada,” Élia dehan iha ámbitu selebra aniversáriu Hospital Nacional Guido Valadares (HNGV) ba dala-22 iha resintu HNGV, Bidau, sesta ne’e.
Nia afirma, labele foti no uza reajente laboratóriu bá iha klínika privada tanba klínika privada Governu fó lisensa atu fó kuidadu saúde primária no mós ba atendimentu báziku.
“Klínika privaa sira ita fó lisensa atu halo internamentu tuir kritéria ne’ebé mak iha,” nia dehan.
Iha fatin hanesan, Diretór Ezekutivu HNGV, Nuno Vital Soares, hateten informasaun ne’ebé mak Ministra Saúde ko’alia ne’e bazeia ba informasaun ne’ebé hetan, maibé HNGV sempre kontrola no mós fó-atensaun nafatin.
“Ami HNGV sempre kontrola no tau-atensaun nafatin. Bainhira hetan informasaun sira hanesan ne’e, ami halo intervensaun kedas,” Nuno konklui.
Jornalista: Felicidade Ximenes
Editór: Xisto Freitas da Piedade
