DILI, 27 Juñu 2025 (TATOLI)—Diretór Jerál Servisu Rejistu Notariadu, Agostinho Gonçalves Vieira, hateten ekipa husi Empreza ZCHWAN TECH hala’o enkontru ho ekipa Ministériu Justisa (MJ) hodi ko’alia kona-ba dijitalizasaun servisu atendimentu públiku iha Servisu Rejistu Notariadu (DGSRN-sigla portugeza) liuliu bá iha Billete Identidade no atendimentu públiku sira seluk.
“Ohin ekipa empreza ZCHWAN TECH husi Malázia mai halo enkontru tékniku ho ekipa Ministériu Justisa hodi halo promosaun ba sira-nia obra kona-ba oinsá atu dijitaliza servisu públiku hanesan Rejistu Notariadu bá iha Digital Identity liga ba Billete Identidade no dijitaliza servisu públiku sira seluk,” Agostinho hateten ba jornalista sira hafoin enkontru ho ZCHWAN TECH, iha edifisiu Ministériu Justisa, Kolmera, sesta ne’e.
Iha fatin hanesan, Diretór Empreza ZCHWAN TECH, Steven Lim hateten Empreza ZCHWAN TECH hetan oportunidade hasoru-malu ho ekipa Ministériu Justisa hodi partilla kona-ba esperiénsia saida mak durante ne’e Empreza ZCHWAN TECH halo ona.
Nia dehan, Timor-Leste tempu besik sai ona membru Nasaun Sudeste Aziátiku (ASEAN-sigla ingleza), entaun presiza dijitaliza servisu atendimentu sira.
Steven informa, bá-oin mak Governu Timor-Leste hato’o prontidaun hodi koopera ho ZCHWAN TECH, sei dijitaliza servisu atendimentu públiku iha Timor-Leste.
Jornalista: Natalino Costa
Editór: Xisto Freitas da Piedade
