Heineken Timor-Leste hetan sertifikadu internasionál rua
DILI, 27 Juñu 2025 (TATOLI)—Empreza Heineken Timor-Leste hetan sertifikadu internasionál rua liuhusi avaliasaun audiotoria produsaun husi Loyed Register Quality Assurance (LRQA) ne’ebé hetan akreditasaun husi United Kingdom Acreditation Service (UCAS).
Jerente Heineken Timor-Leste, Komang Satria Wibawa, hateten, sertifikadu rua ne’e mak hanesan FSSC 22000:2023 kona-ba seguransa alimentár no ISO 9001 kona-ba sistema jestaun ho kualidade iha empreza ida-ne’e.
“Ida-ne’e sai hanesan indústria dahuluk ne’ebé mak hetan sertifikadu internasionál, ne’ebé sai eransa ida ba kompromisu Heineken Timor-Leste hodi kontinua prodús produtu ne’ebé ho kualidade a’as no seguru ba ema hodi konsumu,” Jerente Heineken Timor-Leste informa iha salaun Heineken, Hera, Sesta ne’e.
Notísia relevante : PNTL-Heineken estende kooperasaun programa “Timoroan hemu tua ho responsabilidade”
Iha biban ne’e, nia agradese ba parte hotu ne’ebé mak durante ne’e suporta, liuliu parte Governu, parseiru nomós kliente sira-ne’ebé sai inspirasaun ba sira hodi nafatin iha previléjiu prodús produtu ne’ebé di’ak liu, liuhusi traballadór timoroan 90% Heineken.
“Atinjementu ida-ne’e liuhusi koolaborasaun entre departamentu sira iha empreza ida-ne’e, espera bele ajuda promove liután indústria iha Timor-Leste, nune’e bele iha papél ne’ebé ativu no influénsiadu espesialmente iha setór manufakturra,” nia akresenta.
Jerente Quality Assurance, Angela Soares, hateten, molok atu atinje rezultadu ne’e, hakat pasu boot ne’ebé signifikativu tebes ba efisiénsia operasionál, seguransa produtu no konfiansa kliente.
“Enkuantu sertifikasaun ISO 9001 ne’e mak atinje maibé kona-ba sertifikasaun FSSC 22000:2023 ne’e hanesan upgrade ida husi sertifikasaun ISO 2022 tanba antes iha tinan 2023 sira hetan tiha ona. Maibé iha tinan 2025 ne’e halo upgrade ba FSSC 22000:2023,” Jerente ne’e esplika.
Aleinde ne’e, traballadór Heineken na’in-25, mós hetan hotu sertifikasaun rua ne’e ba partisipasun treinamentu durante loron-tolu.
“Formasaun ne’e iha loron-tolu ba introdusaun ISO 9001 nomós formasaun internál ba auditoria FSSC 22000:2023 husi órgaun sertifikasaun Loyed Register Quality Assurance (LRQA) ne’ebé hetan akreditasaun husi United Kingdom Acreditation Service,” nia katak.
Jornalista : Alexandra da Costa
Editora : Julia Chatarina
