DILI, 26 Juñu 2025 (TATOLI)—Ministériu Komérsiu no Indústria (MCI-sigla portugeza) suspende distribuisaun ka sirkulasaun bee ho marka AQUASE 1.500 ml husi populasaun sira iha merkadu.
Diretora Nasionál Regulasaun Komersiál MCI, Manuela da Silva, hateten nia simu keixa husi komunidade, tanba ne’e nia hala’o teste iha Laboratóriu Nasionál Institutu Nasionál Saúde Públika Timor-Leste (INSPTL) Ministériu Saúde hodi analiza kualidade bee, konfirmadu katak bee nia kualidade ladún di’ak.
“Diresaun Nasionál halo koordenasaun ho instituisaun relevante sira hodi foti amostra no rezultadu hatudu katak bee ne’e iha kódigu produsaun ne’ebé lahanesan 1.500 ml no sabór ne’ebé diferente, maski botir sira-ne’e hanesan de’it,” Manuela da Silva dehan ba jornalista sira iha konferénsia imprensa, iha Bebora, Dili, kinta ne’e.
Tuir responsavel ne’e, bee ne’e la prenxe ezijénsia husi Organizasaun Mundiál Saúde no Ministériu Saúde atu ema konsume.
“Tanba ne’e ami hakarak informa ba públiku atu labele konsume bee ho marka AQUASE no ami mós husu ba autoridade alfándega atu suspende bee referidu,” nia propoin.
MCI foti amostra bee referidu husi empreza sira hanesan Suhurama iha Praia dos Coqueiros, Salima Unip, Lda iha Tasi Tolu, Frandea iha Kuluhun de Baixo, Seng Ling Feng iha Komoro, Chilo Lem iha Likisá.
Iha fatin hanesan, Tékniku Laboratóriu INSPTL Ministériu Saúde, Crispin Afonso, informa katak INSPTL simu amostra no halo teste iha loron 10 fulan-Juñu, no rezultadu teste, hetan parametron ne’ebé bele estraga ema.
“Iha teste laboratóriu, ami hetan parametron ne’ebé bele estraga kakutak, rins, no isin husi konsumidór sira,” responsavel ne’e esplika.
Tékniku ne’e sujere atu ministériu relevante foti medida rigorozu ba empreza importadór sira hodi labele hatama tan bee ida-ne’e mai iha Timor-Leste.
Jornalista: Felicidade Ximenes
Editór: Xisto Freitas da Piedade
