Ministra Élia solisita Profisionál saúde iha HNGV tenke servisu profisionál no imparsiál
DILI, 27 Juñu 2025 (TATOLI)—Ministra Saúde, Élia dos Reis Amaral hateten Hospital Nacional Guido Valadares (HNGV) selebra aniversáriu ba dala-22, tanba ne’e husu profisionál saúde sira tenke servisu profisionál no imparsiál.
“Ita ohin komemora aniversáriu HNGV ba dala 22 ho tema “Hatudu gratidaun no esperansa iha kuidadu ba pasiente”. Signifika, tane nafatin valór umanista hodi orienta ita-nia servisu no kompeténsia hodi serbí povu ho imparsiál no profisionál,” Élia dos Reis Amaral hateten liuhusi nia diskursu, iha ámbitu selebrasaun loron aniversáriu HNGV ba dala-22 iha HNGV, Bidau, sesta ne’e.
Nia hateten, tinan 22 HNGV servisu hanesan esperansa ba família hotu-hotu iha fatin ida-ne’e, iha korridór ida-ne’e, presiza tau hanoin kona-ba istória moruk no istória midar ne’ebé hotu-hotu enfrenta.
“Ba profisionál saúde ne’ebé sakrifika aan hodi serbí ita-nia komunidade, ba família sira-ne’ebé fó konfiansa ba sistema saúde no ba instituisaun parseiru sira-ne’ebé kontinua fó apoiu, ohin bá oin ita sei halo di’ak liután, bele hadomi di’ak liután, bele fó atensaun di’ak liután ba pasiente no família sira-ne’ebé akompaña pasiente mai iha HNGV,” nia deklara.
Élia haktuir, ba profisionál saúde sira-ne’ebé iha tempu difísil inklui tempu krize ba pandemia Covid-19, konsideradu hanesan eroi iha tempu difisil até agora.
“Ita halo esforsu boot atu kontinua servisu ba povu. Ita komprende katak dezafiu sempre mai iha kada loron. Ita hatene katak kondisaun traballu mak izije liu, maibé iha tempu ne’ebé hasoru difikuldade, amostra ita-nia valór domin ba pasiente liuhusi atendimentu,” nia informa.
Iha fatin hanesan, Vise Primeiru-Ministru, Ministru Koordenadór Asuntu Sosiál, Mariano Sabino dehan, HNGV selebra ninia aniversáriu ba dala-22 ida-ne’e sai reflesaun ba profisionál Saúde sira atu fó atendimentu ne’ebé di’akliu ba pasiente sira.
“Ita halo reflesaun no haree didi’ak oinsá ita-nia HNGV nu’udár ospitál fundamentu primeiru iha kedas liña oin hafoin ospitál referrál, sentru saúde, postu saúde no klínika sira,” nia dehan.
Nia esplika, Governu Konstitusionál Dasiak nia rekoñesimentu ba profisionál saúde nia papél ne’ebé atende pasiente sira-ne’ebé baixa iha HNGV.
Inaugurasaun rezidénsia médiku
Entretantu, Ministra Saúde akompañadu husi Vise Primeiru-Ministru, Ministru Koordenadór Asuntu Sosiál, Mariano Sabino, inaugural konstrusaun rezidénsia ba médiku iha HNGV.
“Ita hatene katak rezidénsia ba médiku sira iha-ne’ebá antigu loos ona. Tanba ne’e, liuhusi kolaborasaun ho Ministériu Obra Públika no Ministériu Planu Investimentu Estratéjiku (MPIE), ohin bele rezulta ona rezidénsia ba médiku sira,” Élia haktuir.
Nia esplika, orsamentu hodi konstrui rezidénsia andár rua ne’e hamutuk $243.717,47 no konstrusaun hahú iha 27 Dezembru 2023 liubá.
“Uma ne’e ita oferese ba profisionál saúde sira nune’e sira hela besik HNGV liuliu espesialista sira atu atende nesesidade pasiente sira,” nia afirma
Antes ne’e, Primeiru-Ministru Kay Rala Xanana Gusmão, fó orientasaun ministériu tutela atu halo reabilitasaun urjénsia ba rezidénsia médiku kubanu iha Bidau Toko Baru, Dili.
Orientasaun ne’e, Xefe Governu fó hafoin hamutuk ho Ministru Obra Públika, Samuel Marçal, Ministra Saúde, Élia dos Reis Amaral no Ministru Planeamentu Investimentu Estratéjiku, Gastão Francisco de Sousa, tun direta observa kondisaun rezidénsia ne’ebé hahú aat ona.
“Ita presiza hadi’a urjente para fasilita doutór sira bele hela ho di’ak,” PM Xanana hateten hafoin observa rezidésia iha Bidau.
Hatán ba orientasaun ne’e, Ministru Obra Públika koordena kedas ho Ministra Élia dos Reis no Ministru Gastão Sousa hodi halo preparasaun ba reabilitasaun. Rezidénsia ne’e harii dezde tempu okupasaun Indonézia, kompostu hosi uma boot tolu no cobe house rua.
Jornalista: Felicidade Ximenes
Editór: Xisto Freitas da Piedade
