VIKEKE, 30 Juñu 2025 (TATOLI)—Xefe suku Afaloikai, postu administrativu Uatukarbau, munisípiu Vikeke, Abilio Soares, husu Ministériu Agrikultura, Pekuária, Peska no Floresta (MAPPF) aumenta pesoál saúde animál hodi fó tratamentu ba komunidade nia animál ne’ebé moras.
Notísia Relevante: Pesoál saúde animál Vikeke na’in-14 ativa fali servisu
“Ohin, loron komunidade nia animál moras no balum mate beibeik ona, maibé pesoal saúde animál iha postu Uatukarbau ema na’in-ida (1) de’it, entaun labele kobre hotu ba suku neen no aldeia 30, iha postu administrativu Uatukarbau. Tanba ne’e, ha’u husu Sekretáriu Estadu Floresta (SEF) nu’udar mós reprezentante ministru hodi rekruta pesoál saúde animál hodi destaka iha kada suku hodi halo tratamentu ba komuidade nia animál sira-ne’ebé hetan moras,” Abilio Soares hato’o iha salaun postu Uatukarabu, ohin.
Autoridade komunitária ne’e profunda, komunidade ne’ebé moris iha área rurál maioria moris haki’ak animál habesab karau, bibi, manu no fahi hodi sustenta família uma laran nian, maibé peste moras sempre afeta ba komunidade nia animál ne’ebé sira haki’ak.
“Iha tinan ida-ne’e (2025) hahú husi fulan-Janeiru to’o fulan-Juñu ne’e, iha ha’u-nia suku Afaloikai, komunidade sira-nia fahi mate hamutuk neen (6) no karau mate hamutuk (16). Tanba ne’e, mak ami preokupa hodi husu Governu koloka pesoál saúde animál hodi atende ba komunidade nia animál ne’ ebé moras,” nia dehan.
Hatán ba preokupasaun ne’e, Sekretáriu Estadu Floresta (SEF), Fernandino Veira da Costa, hateten kona-ba rekurusu pekuária númeru limitadu tanba ne’e mak koloka ba postu sira ho númeru ki’ik, labele koloka to’o iha suku no aldeia sira hodi fó tratamentu ba komunidade nia animál sira-ne’ebé moras.
“Iha postu Uatukarbau ita-nia pesoál saúde animál ne’ebé treinandu ema ida (1) de’it, entaun nia labele kobre hotu suku no aldeia sira. Satán iha postu Uatukarbau suku neen (6) no iha aldeia 30 ne’e, defisil kobre hodi fó tratamentu ba ita-nia komundade nia animál. Preokupasaun sira-ne’e ha’u sei hato’o ba Sekretáriu Estadu Pekuária hodi haree asuntu ida-ne’e. Se bele, aumenta tán veternária iha postu Uatukarbau tanba postu ida-ne’e área luan, nune’e ida ne’e labele kobre hotu,” nia hateten.
Jornalista : Vitorino Lopes da Costa
Editór : Cancio Ximenes
