DILI, 30 Juñu 2025 (TATOLI)—Embaixadór Japaun iha Timor-Leste, Tetsuya Kimura, inaugura Eskola Sekundária São Francisco de Assis iha Munisípiu Manufahi.
“Iha loron 27 Juñu 2025, Embaixadór Japaun iha Timor-Leste, Tetsuya Kimura, marka prezensa hodi inaugura Eskola Sekundária São Francisco de Assis iha Munisípiu Manufahi,” sita komunikadu imprensa ne’ebé TATOLI asesu husi Embaixada Japaun ba Timor-Leste, segunda ne’e.
Serimónia ne’e organiza husi Fundasaun São Francisco de Assis, ONG lokál ne’ebé implementa projetu ne’e. Ofisiál Governu lokál husi autoridade relevante, profesór no estudante sira hamutuk ho Embaixadór Kimura partisipa iha serimónia referida.
Tuir Tetsuya, edifísiu eskola foun ida-ne’e marka pasu importante ida iha dezenvolvimentu ensinu sekundáriu iha rejiaun ida-ne’e no ida-ne’e sei serbí la’ós de’it nu’udár sentru aprendizajen, maibé mós nu’udár fatin ida-ne’ebé foinsa’e sira haburas sira-nia mehi no aspirasaun, hodi foti pasu sira-ne’ebé fiar-aan ba futuru ida-ne’ebé nabilan liu.
Projetu ida-ne’e hetan apoiu husi Governu Japaun ho totál orsamentu $72.992 liuhusi Grant Asisténsia ba Projetu Baze no Seguransa Umana (GGP). Edifísiu eskola foun ne’e iha sala tolu, sala profesór nian rua no sintina tolu, ne’ebé fó benefísiu ba estudante na’in-719 no profesór na’in-22.
Dezde lansa projetu dahuluk iha tinan 2000, projetu hamutuk 141 mak implementadu ona tuir eskema GGP iha munisípiu 13 iha Timor-Leste. Projetu sira prinsipalmente fó asisténsia ba infraestrutura komunitária, inklui konstrusaun no reabilitasaun ba instalasaun eskolár sira, klínika públika sira no sistema fornesimentu bee, hodi hatán ba nesesidade umana bázika oinoin iha baze.
Jornalista: Felicidade Ximenes
Editór: Xisto Freitas da Piedade
