VIKEKE, 30 Juñu 2025 (TATOLI)—Prezidente Komisaun B asuntu Negósiu Estranjeiru, Defeza no Seguransa husi Parlamentu Nasionál (PN), Domingos Augosto ‘Deker’, hateten Komisaun B apresia prestasaun servisu PNTL sira iha munisípiu Vikeke ne’ebé bele redús kazu krime sira-ne’ebé uluk aas, maske sira menus rekursu maibé sira iha vontade servisu ho responsabilidade.
“Ami apresia tebes servisu PNTL munisípiu Vikeke nian, tanba ita ko’alia kona-ba violénsia munisípiu Vikeke mós kazu aas. Maibé, PNTL sira-nia servisu, esforsu, pasiénsia bele redús kazu violénsia iha munisípiu Vikeke,” Domingos Augosto ‘Deker’ hateten ba jornalista sira, hafoin ramata fiskalizasaun ba PNTL munisípiu Vikeke, ohin.
Prezidente komisaun B ne’e rekomenda ba PNTL munisípiu Vikeke atu nafatin mantein pozisaun no protidaun hodi asegura páz establidade iha munisípiu Vikeke.
“Tanba ne’e, ohin, ami komisaun B mai halo fiskalizasaun hodi hatene situasau seguransa, atu komfirma orsamentu Estadu aloka ba PNTL no planu PNTL Vikeke nian. Ba difikuldade sira-ne’ebé PNTL Vikeke enfrenta mak menus rekursu, fasilidade no edifísiu no transporte. Difikuldade sira-ne’e ami anota no ami fila sei aprezenta ba Governu hodi haree no tau ba konsiderasaun atu reforsa PNTL,” nia hateten.
Nune’e mós, nia dehan, iha fiskalizasaun ne’e komisaun B nota mós rekursu PNTL munisípiu Vikeke menus tebes no transporte operasaun ne’ebé komisaun B rekolla ona relatóriu hodi ba aprezenta ba ministériu kompetente.
Iha fatin hanesan sekretária komisaun B deputada, Sança Tilman, rekomenda ba Polísia Unidade Vulnerabilidade (PUV) hakbesik ba komunidade halo sensibilizasaun ba kazu violénsia doméstika, atu redús krime violénsia doméstika iha munisípiu Vikeke.
“Ha’u rekomenda ba PUV sira hkbesik ba ita-nia komunidade hodi sensibilzia violénsia doméstika ba ita-nia komunidade, atu sira bele komprende hodi redús kazu referidu. Kazu kontinua rejista tanba ita-nia komunidade seidauk hatene kle’an. Tan ne’e, ita presiza halo fahe informasaun ba ita-nia komunidade,” nia dehan.
Iha biban ne’e, Komandante PNTL munisípiu Vikeke, Superintendente Polísia António Rego Fernandes, hato’o agradesementu ba Komisaun B husi Parlamentu Nasionál ne’ebé kada tinan halo fisklizasaun ba komandu PNTL munisípiu Vikeke hodi halo fiskaliza ba servisu operasionál, administrasaun iha munisípiu Vikeke.
“Nune’e, iha fiskalizasaun ne’e ami aprezenta ba Komisaun B kona-ba progresu no obstakulu sira-ne’ebé PNTL munisípiu Vikeke enfreta durante ne’e. Difikuldade ne’ebé durante ne’e ami enfrenta mak infraestutura postu eskuadra sira, transporte no rekursu. Ha’u espera no ba oin Governu bele rezolve problema sira-ne’ebé PNTL enfrenta,” nia hateten.
Tuir dadus, kazu rejista hahú Janeiru to’o fulan-Juñu rejista kazu hamutuk 94 ne’ebé kompostu husi ofensa simples hamutuk 24, víolénsia doméstika 36, danu simples sia (9) no asaltu hitu (7), kompara ba tinan 2024 rejista kazu totál hamutuk 162.
Enkuantu, daudaun ne’e membru PNTL munisípiu Vikeke ho totál hamutuk na’in-135. Husi númeru ne’e, membru polísia ne’ebé moras na’in-neen (6) no moras permanente na’in ida no husi membru PNTL hirak ne’e destaka iha komandu PNTL munisípiu Vikeke no destaka iha eskuadara Lakluta, Vikeke Vila, Uatulari, Ossú no Uatukarbau.
Jornalista : Vitorino Lopes da Costa
Editór : Cancio Ximenes
