Parlamentu husu MS reforsa asaun kombate moras tuberkuloze
DILI, 30 Juñu 2025 (TATOLI) – Parlamentu Nasionál (PN), liuhusi Prezidente Komisaun F ne’ebé trata Asuntu Saúde, Seguransa Sosiál no Igualdade Jéneru, solisita ba Ministériu Saúde (MS) atu reforsa asaun kombate moras tuberkuloze (TB) iha Timor-Leste.
Prezidente Komisaun F, Maria Gorumali Barreto, dehan tuir fiskalizasaun Komisaun nian iha munisípiu, profisionál saúde relata kazu TB nia númeru iha redusaun, maibé sira kontinua halo tratamentu ba pasiente sira husi 2024 nian no kontinua mai iha 2025.
“Tuir fiskalizasaun, iha trimestre dahuluk rejista kazu TB foun iha munisípiu, maibé númeru ladún boot. Kada instalasaun saúde rejista pasiente na’in-10 mai kraik”, nia informa.
Nia husu ba MS atu kontinua reforsa medida no asaun hodi kombate moras referida hanesan buka, deteta, halo tratamentu no prevensaun.
Jerente Programa Nasionál Tuberkuloze iha MS, Costantino Lopes, relata katak iha Janeiru to’o Marsu tinan ne’e, ema na’in-1.400 mak infetadu ba moras TB iha territóriu. Dadus husi MS nian iha 2024 rejista pasiente TB hamutuk rihun 4.
Notísia relevante: Trimestre dahuluk, MS rejista kazu TB hamutuk 1.400 iha TL
Jornalista: Nelson de Sousa
Editora: Maria Auxiliadora
