DILI, 30 Juñu 2025 (TATOLI) – Prezidente Parlamentu Nasionál (PPN), Maria Fernanda Lay, no Vise-Prezidente Senadu Parlamentu Malázia, Datuk Nur Jazlan bin Tan Sri Mohamed, hasoru malu hodi ko’alia kona-ba interese país rua ne’e nian.
Fernanda Lay hateten sorumutu ne’e hanesan pasu dahuluk nian atu hametin relasaun diplomátika entre Parlamentu Timor-Leste no Malázia.
Biban ne’e, parte rua aborda mós área saúde, transporte, agrikultura no investimentu iha futuru. Aleinde ne’e, promove kooperasaun Parlamentu rai rua ba kapasitasaun ba membru Parlamentu Timor-Leste iha kontestu fortalese demokrasia.
Maria Fernanda Lay agradese ba apoiu Malázia nian ba pós-adezaun Timor-Leste nian ba ASEAN no mós kooperasaun durante ne’e entre povu rai rua no espera lasu amizade ne’e metin liután.
“Ohin, ha’u espresa preokupasaun liga ho rekursu umanu. Ita sei presiza apoiu husi nasaun ASEAN nian ne’ebé hetan ona membru kompletu atu apoia la’ós antes adezaun de’it, maibé depoiz adezaun. Ha’u mós hato’o dezafiu bele transforma sai oportunidade ba Timor-Leste atu hetan benefísiu la’ós parte rua, maibé ba povu Timor-Leste tomak. Ida-ne’e mak importante katak deputadu sira mós tenke iha formasaun”, nia hato’o.
Liga ba investimentu, Fernansa Lay dehan sei iha problema kona-ba rai, nune’e entrega ba parte Governu hodi haree kestaun ne’e. “Tanba merkadu boot tebes bainhira ita sai parte ASEAN”, konklui.
Jornalista: Nelson de Sousa
Editora: Maria Auxiliadora
