DILI, 30 Juñu 2025 (TATOLI) – Primeiru-Ministru, Xanana Gusmão, halo abertura ba Tasa Rotativa Avo Nana Cup Femenina 2025 iha kampu futsal Ponte P.J Habibie, Dili.
Iha abertura referida, Xanana Gusmão, agradese ba inisiativa Komisaun Organizadora ne’ebé lidera husi Feliciano Perpeito Ximenes ‘Remon’ ne’ebé ho motivasaun boot ba iha área desportu hodi buka patrosinadór hodi apoia fundu hodi realiza atividade ne’e.
Tasa Avo Nana Cup ho nia lema “Amar e Promover Futebol” ida-ne’e la’ós futsal de’it, maibé ba modalidade desportiva tomak.
“Ita-boot sira-nia apoiu ba atividade ida-ne’e importante tebes, tanba ita nu’udar empreza hatene no haree difikuldade Governu nian. Ita-boot sira hatudu imi-nia domin ne’ebé iha partisipasaun sosiál bele apoiu Remon hodi realiza atividade ida- ne’e”, Xanana Gusmão hateten.
Iha biban ne’e, Xefe Ezekutivu husu ba jogadór sira atu aproveita oportunidade sira ne’e sai jogadór ne’ebé di’ak, nune’e bele kompete mós ba jogu futsal internasionál.
Iha fatin hanesan, Prezidente Komisaun Organizadora ba Tasa Rotativa Avo Nana Cup, Feliciano Remon, hateten prezensa primeiru-ministru iha abertura atividade ne’e, tanba nu’udar konselleiru ba Prezidente ba Relay Laleia FC.
Nia konta tuir bainhira sira iha inisitiva harii sede iha Laleia, primeiru-ministru bá inaugura no loke kedas Don Martinho Cup. Nia rasik dehan “ami tenke apoiu Governu haree isiativa di’ak halo dezenvolvimentu futeból iha rai-laran tuir kbiit ne’ebé iha”.
Nune’e, jogu Don Martinho Cup la’o ona no agora kontinua ho Avo Nana Cup. Bainhira jogu ne’e hotu sei kontinua tan ba Tasa Ma’Huno nian ne’ebé sei la’o hotu iha tinan ne’e, bazeia ba orientasaun husi Xefe Governu nu’udar Manatutu oan.
“Ida-ne’e orientasaun husi primeiru-ministru. Ami organiza de’it hodi promove ita-nia jogadór sira ne’ebé iha talentu futeból no parte ida apoiu mós Governu”, dehan.
Iha tasa rotativa Avo Nana Cup ne’e kompostu husi klube femenina 16 mak sei partisipa. Klube sira ne’e mai husi munisípiu Lautein, Aileu, Ermera, Manatutu, Likisá no Dili.
“Ohin halo ona abertura, ami sei hein BNCTL Cup ne’ebé agora uza hela kampu futsal Bebora hotu mak ami kontinua jogu. Nune’e, ami sei deskansa semana ida mak joga fali. Tuir planu, sei enserra iha 25 Jullu 2025”, nia informa.
Prémiu ba taxa rotativa Avo Nana Cup ne’e ne’e ba vensedór dahuluk sei hetan rihun $5, segundu rihun $3, terseiru rihun $2 no kuartu rihun $1.
Iha abertura Avo Nana Cup ida ne’e hetan prezensa husi Vise-Primeiru-Ministru, Ministru Koordenadór ba Asuntu Sosiál, Mariano Assanami Sabino, Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, inklui membru Governu balun no patrosinadór hanesan Virnie Unipessoal Lda.
Jornalista: Arminda Fonseca
Editora: Maria Auxiliadora
