VIKEKE, 30 Juñu 2025 (TATOLI)—Xefe aldeia Beturia, suku Irabin de Baixo, postu Uatukarbau, munisípiu Vikeke, Julio Gomes, husu Sekretáriu Estadu Floresta (SEF) koloka pesoál atendementu lisensa tesi ai iha postu Uatukarbau hodi fasilita komunidade trata lisensa.
“Durante ne’e, ita-nia komunidade atu kado ai halo uma sira tenke ba Vikeke mak foin halo lisensa kado ho distánsia ne’ebé do’ok, selu karreta foin la’o ba mai. Entaun osan sira-ne’ebé sira atu uza ba tesi ai, dala ruma sira selu de’it ba karreta. Tanba ne’e, ha’u hakarak husu ba Sekretáriu Estadu Floresta (SEF) koloka atendementu lisensa tesi ai nian, iha ami-nia postu hodi hafasil komunidade trata lisensa,” Julio Gomes hateten ba Agência TATOLI, iha postu Uatukarbau, ohin.
Durante ne’e, nai dehan, komunidade ba kado sira-nia ai hodi halo uma sira tenke ba Vikeke foin trata lisensa hodi tesi ai, no ida-ne’e sai hanesan difikuldade ba komunidade ne’ebé daudaun ne’e hela iha área rurál.
“Ami sente lisensa tesi ai sai dezafiu ba komunidade tanba atu tesio ai tenke iha lisensa foin tesi. Ho ida-ne’e, ami husu koloka administrasaun lisensa ida iha Uatukarbau hodi komunidade lalika la’o do’ok mak hasa’i lisensa. Ha’u espera ba oin Governu bele tau ba atensaun ba ita-nia komunidade,” nia dehan.
Hatán ba preokupasaun ne’e, Sekretáriu Estadu Floresta (SEF), Fernandino Veira da Costa, hateten problema tesi ai ne’e uluk kedas komunidade ko’alia katak postu Uatukarbau distánsia do’ok husi munisípiu Vikeke.
“Problema ida-ne’e uluk ha’u mai uluk Uatukarbau ita-nia komunidade hato’o ona ba ha’u, nusa mak la koloka ema ruma husi floresta nian iha postu Uatukarbau hodi trata lisensa tesi ai nian. Tanba iha ne’e distánsia ba munisípiu Vikeke ne’e do’ok. Ha’u sei orienta diretór Nasionál husi diresaun Dezenvolvimentu Floresta Komunitária (DFK) hasai lisensa hodi haree preokupasaun autoridade no komunidade nia preokupasaun sira-ne’e,” Governante ne’e rekoñese.
Nia dehan, Governu nia dever mak ida mak fasilita nia sidadaun sira maibé se Governu la fasilita nia sidadaun sira ho di’ak entaun ida-ne’e la’ós Governu ida-ne’ebé jestaun di’ak ba povu.
“Problema sira-ne’e ita buka ninia dalan hodi buka solusaun atu rezolve, tanba ita-nia komunidade tesi sira-nia ai tenke la’o husi Uatukarbau ba munisípiu mak foin hasai lisensa. Tan ne’e, ita presiza hadi’a hodi fasilita ita-nia komunidade la’o besik,” nia hateten.
Tuir dadus, populasaun postu Uatukarbau totál hamutuk 10.889 ne’e hela iha suku neen (6) no aldeia hamutuk 30 ne’ebé eziste iha postu Uatukarbau.
Jornalista : Vitorino Lopes da Costa
Editór : Cancio Ximenes
