Deputada PN husu Baukau-oan hametin pás
DILI, 01 Jullu 2025 (TATOLI)—Deputada Parlamentu Nasionál (PN) husu Baukau-oan atu kontinua hametin unidade nune’e mantein estabilidade pás no seguransa iha Munisípiu Baukau antes implementa podér lokál no desentralizasaun administrativa.
Deputada Parlamentu Nasionál Bankada Partidu Demokrátiku (PD), Maria Teresa Gusmão, rekoñese Baukau sempre iha konflitu maibé situasaun referida hahú redús nune’e husu joven sira kontinua hametin unidade atu prepara di’ak liután bainhira implementa ona desentralizasaun.
“Kuandu la asegura seguransa iha ita-nia munisípiu, afeta ba buat hotu paradu,” Deputada Maria Teresa Gusmão informa ba TATOLI iha ninian kna’ar fatin, Parlamentu Nasionál, tersa ne’e.
Deputada ne’e informa katak bainhira dezestabiliza seguransa, sei redús númeru vizitante inkluindu hapara movimentasaun komunidade ne’ebé hala’o vida ekonomia iha interna Baukau rasik.
Aleinde ne’e, Maria rekoñese konflitu entre joven sira akontese tanba fatór dezempregu maibé enkoraja nafatin kapasita aan no hala’o atividade pozitiva nune’e bele kontribui pás no desentralizasaun iha Baukau.
“Buat barak sei la’o mezmu neneik maibé fó-hanoin ba joven sira atu habelar pás tanba sei atrai ema barak ba investe iha ita-nia rai,” Maria tenik.
Governu liuhosi Ministériu Administrasaun Estatál (MAE) sei aprezenta kontinua halo avaliasaun kona-ba kondisaun mínima antes aplika lei tolu kona-ba polítika desentralizasaun administrativa iha kada munisípiu.
Entretantu, implementasaun desentralizasaun administrativa bazeia ba Konstituisaun Repúblika Demokratika Timor-Leste (KRDTL) artigu 72, nune’e loke dalan ba kriasaun lei sira hanesan lei númeru 23/2023, loron 10 Novembru, regulariza implementasaun podér lokál no desentralizasaun administrativa.
Seluk, Lei númeru 16/2023, loron 31 Maiu, kona-ba finansa munisipál sei regulariza maneira hotu utilizasaun orsamentu no lei númeru 22/2021, loron 4 Novembru, kona-ba eleisaun munisipál sei regulariza mekanizmu eleisaun ba membru asembleia no prezidenti autoridade munisipál.
Jornalista: Natalino Belo
Editór: Xisto Freitas da Piedade
