DILI, 01 Jullu 2025 (TATOLI)—Deputada Parlamentu Nasionál (PN) husi Bankada Partidu Demokrátiku (PD), Maria Teresa Gusmão konsidera Munisípiu Baukau preparadu ba implementasaun polítika desentralizasaun administrativa no podér lokál tanba iha rekursu sufisiente.
Nia dehan, PN kontinua apoia polítika referida tanba lori dezenvolvimentu bá iha kada munisípiu no Baukau iha rekursu umanu no naturál ne’ebé sei fó benefisiu ekonomia bainhira implementa podér lokál.
“Ha’u dezafia hotu-hotu atu lolo liman suporta malu atubele harii podér lokál no desentralizasaun administrativa ne’ebé di’ak ba Baukau-oan hotu,” Deputada Parlamentu Nasionál ne’e informa ba TATOLI iha ninian kna’ar fatin, tersa ne’e.
Deputada ne’e deskreve, rekursu umanu husi sufisiente tanba maioria nu’udár intelektúal no koñesimentu natoon maibé presiza aumenta formasaun hodi hasa’e kapasidade kona-ba lala’ok podér lokál.
Aleinde ne’e, rekursu naturál mós sufisiente hanesan iha tasi no foho kompostu setór turizmu, agrikultura, rikeza naturál ne’ebé bele garante rendimentu hodi dezenvolve ekonomia iha Baukau.
“Presiza de’it jere ho didi’ak rikusoin hirak-ne’e hodi asegura ekonomia ba dezenvolvimentu Munisípiu Baukau,” Maria akresenta.
Maria Gusmão rekomenda ba Governu sentrál atu kontinua apoia Autoridade Administrasaun Munisipál hodi hadi’a infraestrutura bázika hanesan estrada, edifisiu públiku inklui saneamentu antes implementa polítika referida iha tinan 2027 mai.
Nia husu Autoridade Munisipál kolabora ho Ministériu Finansa hodi halo planu asaun anuál relasiona ho orsamentu jerál Estadu (OJE) kada tinan nune’e bele rezolve hadi’a infraestrutura liuliu estrada urbana to’o rurál.
Governu liuhosi Ministériu Administrasaun Estatál (MAE) sei aprezenta kontinua halo avaliasaun kona-ba kondisaun mínima antes aplika lei tolu kona-ba polítika desentralizasaun administrativa iha kada munisípiu.
Entretantu, implementasaun desentralizasaun administrativa bazeia ba Konstituisaun Repúblika Demokratika Timor-Leste (KRDTL) artigu 72, nune’e loke dalan ba kriasaun lei sira hanesan lei númeru 23/2023, loron 10 Novembru, regulariza implementasaun podér lokál no desentralizasaun administrativa.
Seluk, Lei númeru 16/2023, loron 31 Maiu, kona-ba finansa munisipál sei regulariza maneira hotu utilizasaun orsamentu no lei númeru 22/2021, loron 4 Novembru, kona-ba eleisaun munisipál sei regulariza mekanizmu eleisaun ba membru asembleia no prezidenti autoridade munisipál.
Jornalista: Natalino Belo
Editór: Xisto Freitas da Piedade
