VIKEKE, 01 Jullu 2025 (TATOLI)—Polísia Nasionál Timor-Leste (PNTL) munisípiu Vikeke, husi Jeneiru to’o Juñu ne’e, liuhusi unidade tránzitu rekolla ka kontribui reseita hamutuk $9,054 ba kofre Estadu.
“Hahú husi Janeiru to’o Juñu ne’e, ita konsege rekolla taxa husi infrasaun sira-ne’e hamutuk rihun $9,054 hodi hatama ba kofre Estadu. Nune’e, ba oin, ami sei kontinua halo nafatin check point ba utilizadór rodoviáriu sira iha munisípiu Vikeke,” Komandante PNTL munisípiu Vikeke, superintendente polísia António Rego Fernandes hateten ba Agência Tatoli, iha resintu adimistrasaun Vikeke, ohin.
Komandante PNTL munisípiu Vikeke ne’e subliña, taxa sira-ne’e PNTL liuhusi polísia unidade tránzitu munisípiu Vikeke rekolla husi utilizadór karreta no motorizada laiha dokumentu, dokumentu mate, la uza kapasete no karta kondusaun.
“Atu hasa’e taxa ne’e, loron mós ami nafatin halo operasaun kona-ba koima sira-ne’e, atu sidadaun sira kumpre kódigu estrada sira iha munisípiu Vikeke. Liuliu ba transporte motorizada sira bainhira kondús motorizada tenke uza kapasete, sé mak la uza kapasete mak polísia tránzitu sei aplika sansaun hodi selu koima,” nia hateten.
Tan ne’e, nia dehan, polísia tránzitu sei hala’o atividade auto stop ka check point iha kapitál Vikeke kada loro-loron nomós eskuadra lima implementa mós check point ba rodoviáriu sira hanesan karreta no motorizada sira, tanba eskudra sira koloka ona ofisiál tránzitu hodi apoia ba check point.
Atividade check point ne’ebé PNTL implementa bazeia ba dekretu-lei nú. 6/2003, 03 Abril, kona-ba Kódigu Estrada nian.
“Tan ne’e, ita fó sansaun ba ita-nia sidadaun sira-ne’ebé viola kódigu estrada nian. Nune’e ba ita-nia sidadaun sira kumpri dekretu-lei sira-ne’e ba motorizada bainhira uza estrada públiku tenke uza kapasete atu salva moris bainhira hetan asidente ruma,” nia dehan.
Enkuantu, taxa ne’ebé unidade tranzitu rekolla liuhusi invoce ho totál hamutuk 465 no totál orsamentu ne’ebé rekolla hamutuk $9,054 iha trimestre dauluk no trimestre daruak.
Jornalista : Vitorino Lopes da Costa
Editór : Cancio Ximenes
