DILI, 02 Jullu 2025 (TATOLI)—Atleta Para-badminton ne’ebé hamahan iha Federasaun Komité Paralímpiku Nasionál Timor-Leste (FCPNTL-sigla portugeza), kuarta ne’e, dezloka ona bá Korea Súl atu partisipa jogu World Championship.
Primeiru Vise-Prezidente Asuntu Administrasaun no Finansa FCPNTL, Joãozinho Ferreira da Conceição Fernandes, esplika, hafoin simu konvite, parte federasaun hala’o kedas preparasaun hanesan treinu inklui nesesidade seluk hodi apoia partisipasaun iha kompetisaun referida ne’ebé sei partisipa husi nasaun 20-resin.
“Ohin dezloka ona bá Korea. To’o iha-ne’ebá mak sei kategoriza tuir komisaun nia desizaun,” Joãozinho Fernandes informa ba TATOLI, iha Jináziu Dili.
Nia esplika, FCPNTL deside atleta na’in-ida ho naran Bruno Saldanha, kategoria ema ho defisiénsia, tanba prenxe rekizitu hasesan menus husi idade 25.
Kompetisaun referida nu’udár World Championship ba Youth Sport iha-ne’ebé nasaun Korea mak sai uma-na’in ba Korean Paralímpiku ne’ebé tuir planu sei hahú iha loron 05-10 Jullu tinan ne’e.
“Federasaun garante atleta ne’e sei gaña prestasaun di’ak maibé iha kompetisaun mak sei fó rezultadu,” Joãozinho tenik.
Jornalista: Natalino Belo
Editór: Xisto Freitas da Piedade
