Autoridade Uatukarbau sei implementa operasaun animál okupa espasu públiku
VIKEKE, 02 Jullu 2025 (TATOLI)—Adiministradór Postu Uatukarbau, Munisípiu Vikeke, Anacleto Doutel Sarmento, informa autoridade postu Uatukarbau sei konvoka Asembleia Postu Administrativu (ASPA) Uatukarbau, molok implementa operasaun ba animál sira-ne’ebé livre okupa espasu públiku iha Postu Uatukarabua.
“Kona-ba implementa karta sirkulár ne’ebé autoridade Munisípiu Vikeke ne’ebé foin lalais lansa iha munisípiu, agora daudaun ne’e, ami seidauk implementa. Ami sei konvoka enkontru ASPA hodi deside implementa karta sirkulár ba animál sira-ne’ebé komunidade husik livre iha Postu Uatukarbau,” Anacleto Dautel Sarmento ba Totoli, iha Postu Uatukarbau, kuarta ne’e.
Autoridade Postu Uatukarbau ne’e afirma karta sirkulár ne’e tenke implementa tanba liga ba Dekretu-lei nú. 3/2023 fulan-Janeiru, alterasaun dahuluk husi Dekretu-Lei nú. 33/2008, 27 fulan-Agustu, kona-ba ijiene orden públiku ne’ebé proibe balada sira atu sirkula iha estrada públiku no fatin públiku.
“Tanba ne’e, iha tempu badak ami sei halo mós diseminasaun dekretu-lei no karta sirkulár ba komunidade atubele komprende. Ami mós sei forma ekipa ida-ne’ebé kompostu husi xefe suku no juventude hodi implementa,” Anacleto informa.
Nia dehan, bainhira halo ona diseminasaun ba komunidade, mak kontinua la kumpre no husi nafatin balada sei halo asaun.
Fó-hanoin fali autoridade Munisípiu Vikeke lansa karta sirkulár loron 20 fulan-Juñu iha-ne’e bazeia ba Dekretu-lei nú. 3/2024, 17 fulan-Jeneiru, alterasaun dahuluk husi Dekretu-lei nú. 33/2008, 27 fulan-Agostu, kona-ba ijiene orden públika.
Prezidente Autoridade Munisípiu Vikeke uza kompeténsia bazeia ba dekretu-lei iha leten hodi fó sai karta sirkulár ide-ne’e, atu fó atensaun ba komunidede husi postu administratuvu lima kompostu husi Lakluta, Ossu, Uatulari, Uatukarbau no Vikeke Vila, iha Munisípiu Vikeke katak tenke sulan no kesi balada sira no labele husik balada hanesan karau, kuda, bibi, manu, asu no balada sira seluk tan, ne’ebé husik livre iha uma ninin, edifisiu públiku no fatin públiku sira.
Jornalista: Vitorino Lopes da Costa
Editór: Xisto Freitas da Piedade
