DILI, 02 Jullu 2025 (TATOLI)—Diretór Servisu Ambulánsia no Emerjénsia Médikamentu iha Ministériu Saúde, Simplicio Amaral, hateten bazeia ba kontratu ne’ebé mak estabelese entre Servisu Nasionál Ambulánsia Emerjénsia no Medikamentu ho empreza Timor Safari Unipesoál, Lda, sei sosa ambulánsia haat hodi fó apoiu ba munisípiu, no sei to’o iha Timor-Leste iha fulan-Setembru 2025.
“Progresu kompra ambulánsia nia prosesu aprovizionamentu la’o ona, empreza manán iha ona no sira mós promete mai dehan Setembru sasán tama mai. Di’ak liután karreta mai sedu no labele hanesan iha tinan kotuk liu ba ne’e, ambulánsia mai fali iha Dezembru,” Simplicio Amaral hateten ba jornalista sira iha nia kna’ar fatin, Caicoli, ohin.
Nia esplika, bainhira karreta ambulánsia sira to’o mai ihaTimor-Leste, sei koloka ambulánsia ida ba iha sala Pediatria Hospitál Nasionál Guidu Valadares (HNGV) no tolu ne’e sei koloka ba nunisípiu sira-ne’ebé mak seidauk hetan no balun Ambulánsia nia kondisaun aat ona.
“Karreta sira mai ne’e, ita sei koloka ba iha Pediatria foun iha HNGV, entaun ita espesifiku ba ida-ne’e. Espera katak, tolu ne’e ita sei koloka ba munisípiu sira-ne’ebé ambulánsia laiha ka balun aat ona mak hanesan munisípiu Viqueque, Manufahi no Ainaro bazeia ba relatóriu munisípiu ne’ebé mak transfere pasiente barak ne’e. Aleinde ne’e, iha Ataúru mós sai munisípiu ne’ebé hakarak ka lakohi, ita tenke fó ambulánsia ida ba sira,” nia informa.
Antes ne’e, nia hateten, Servisu Nasionál Ambulánsia no Emerjénsia Médika, Institutu Públiku (SNAEM, I.P) asina kontratu ho diretór empreza Timor Safari Unipesoál, Lda, hafoin sira manán konkursu públiku ne’ebé mak fó sai ba públiku.
“Asina kontratu ho Diretór Empreza Timor Safari Unipesoál Lda, Kenneth Lay hafoin manán iha konkursu públiku ne’ebé mak fó sai ona ba públiku atu kompra karreta ambulánsia,” nia dehan.
Diretór SNAEM ne’e husu ba empreza manán-na’in, atu fornese ho karreta ambulánsia tuir espesifikasaun ne’ebé mak bazeia ba kontratu ne’ebé iha.
Diretór Empreza Timor Safari Unipesoál, Lda, Kenneth Lay, hateten nu’udár manán sei oferese karreta ambulánsia haat no tuir duni espesifikasaun ne’ebé mak hakerek ona iha kontratu nia laran.
“Empreza sei oferese karreta ambulánsia haat ne’e tuir duni espesifikasaun no promesa katak ambulánsia hirak ne’e sei to’o iha Timor-Leste data no fulan ne’ebé mak determina ona iha kontratu entre SNAEM, I.P ho Timor Safari,” nia hateten.
Entertantu, totál orsamentu ne’ebé mak aloka kompra ambulánsia haat ne’e hamutuk rihun $300.
Jornalista : Felicidade Ximenes
Editór : Cancio Ximenes
