DILI, 02 Jullu 2025 (TATOLI)—Federasaun Atletizmu Timor-Leste (FATL) prepara atleta na’in-12 atu partisipa iha modalidade atletizmu relasiona ho jogu kompetisaun Komunidade Nasaun Lian Portugés (CPLP-sigla portugeza).
Prezidente Federasaun Atletizmu Timor-Leste, Afrânio Xavier Amaral, esplika preparasaun referida federasaun hala’o iha fatin rua hanesan Gleno, Munisípiu Ermera sai fatin konsentrasaun atleta kategoria halai naruk, enkuantu atleta haksoit dook no halai badak konsentrada iha Dili.
“Ita koko esforsu atu atleta sira prepara kondisaun ho di’ak no ita espera sira bele hatudu prestasaun di’ak,” Prezidente Federasaun Atletizmu Timor-Leste informa ba TATOLI liuhosi telefónema, kuarta ne’e.
Husi atleta na’in-12 kompostu feto neen no mane neen. Atleta hirak ne’e sei bá kompete iha distánsia oinoin hanesan halai dook kategoria númeru metru 1.500 no metru 3000, atleta kategoria halai númeru metru 100, metru 200, haksoik dook no tuda peizu inklui atleta halai estafeta númeru 4+100.
Afrânio rekoñese katak atleta husi nasaun CPLP maioria kualidade di’ak no kategoria nu’udár estudante nune’e parte FATL seidauk promete gaña medallla iha jogu entre nasaun lian portugés ne’ebé Timor-Leste nu’udár uma-na’in.
“Kondisaun di’ak hotu, atleta sira hetan alimentasaun di’ak no treinadór mós kontinua fó matéria preparasaun ba sira,” nia haktuir.
FATL kontinua halo monitorizasaun ba atleta na’in-12 hanesan kontrola saúde, fiziku no orienta treinadór atu antesipa situasaun seluk atu akontese tanba kompetisaun sei realiza iha tempu besik.
Entretantu, jogu CPLP sei realiza iha Timor-Leste no sei partisipa husi kontinente nasaun hitu ho totál atleta hamutuk 535 ne’ebé hala’o preparasaun iha faze tolu hanesan interna, prepara realizasaun no ezekusaun ne’ebé sei hala’o abertura iha 17 Jullu no sei enserra iha 27 Jullu tinan ne’e.
Jornalista: Natalino Belo
Editór: Xisto Freitas da Piedade
