Komandu instala Eskuadra PNTL ba postu administrativu foun rua iha Baukau
BAUKAU, 01 Jullu 2025 (TATOLI)–Komandu Polísia Nasionál Timor-Leste (PNTL) liuhosi despaxu númeru 311/CG-PNTL/VI/2025, deside hodi instala Eskuadra Polísia iha postu administrativu foun rua iha Munisípiu Baukau.
Postu administrativu foun rua ne’ebé sai alvu ba instalassun Eskuadra PNTL kompostu husi Postu administrativu Kelikai Antigu lideradu Inspetór Xefe Justinho do Carmo Fernandes no Segundu Komadante, Inspetór Leonardo da Costa Freitas, enkuantu Postu Administrativu Matebian lidera husiInspetór Xefe José António Soares no Segundu Komadante Inspetór Antoniho Freitas.
“Eskuadra Polísia ualu iha Baukau, ne’e hamutuk ho komandante inklui segundu komandante, aumenta Postu Matebian ho Kelikai Antigu ohin toma pose,” Komandante PNTL Munisípiu Baukau, Superintendente João Sancho Pires hateten iha ninia kna’ar fatin, Vila Nova, tersa ne’e.
Superintendente Pires dehan, hafoin simu pose, komadante eskuadra no segundu komandante inklui xefe seksaun foun sira halo juramentu atu serbisu hamutuk ho autoridade iha postu ualu hodi serbí povu no nasaun.
Komandu Baukau sei halo koordenasaun ho autoridade postu administrativu foun rua referidu atu apoiu espasu ba ekipa seguransa hodi hein komandu nasionál konstrui edifísiu eskuadra foun.
“Ita hato’o ona proposta, hein komandu bele atende. Maibe, seidauk mós ita koloka ona, tanba ezijénsia komunidade nian importante,” Pires akresenta.
Entretantu, Eskuadra PNTL iha Postu Kelikai Antigu sei kobre suku lima hanesan Afasá, Namanei, Uaitame, Gurusá no Abafala ho totál populasaun hamutuk 11.227 husi totál uma-kain 2.684.
Eskuadra PNTL iha Postu Matebian sei halo seguransa iha suku lima kompostu Suku Laisorulai Décima, Laisorulai de Baixo, Lelalai, Maluru no Abo ho totál populasaun hamutuk 10.420 husi uma-kain 2.534.
Jornalista: Natalino Belo
Editór: Xisto Freitas da Piedade
