PAM Kovalima alerta ba komunidade hadook-an husi fatin risku dezastre naturál
KOVALIMA, 02 Jullu 2025 (TATOLI )- Prezidente Autoridade Munisípiu (PAM), Kovalima, Miguel Armada Cardoso, alerta hodi husu ba komunidade sira atu hadook-an husi fatin ne’ebé risku ba dezastre naturál.
Autoridade Kovalima hato’o asuntu relasiona iha munisípiu Kovalima , daudaun-ne’e tempu klima udan nune’e bele hamosu dezastre naturál hanesan rai halai halo ai sira monu no volume bee mota boot.
“ Iha tempu udan ita-nia komunidade sira presiza hadook aan husi fatin risku hanesan ai-hun boot sira halo movimentu ho kuidadu. Ba inan-aman sira tenke kuidadu mós labarik ki’ik sira labele hakur mota, nune’e bele hadook-an husi risku dezastre naturál”, Miguel Armada Cardoso hato’o ba jornalista sira,iha nia servisu fatin AMC ohin.
Dirijénte másimu Kovalima ne’e , fó hanoin mós ba lidér komunitária sira, iha tempu udan ne’e aproveita oportunidade hodi organiza nia komunidade atu kuda ai-oan hodi prevene dezastre naturál hanesan rai-halai
Fó hanoin fali katak bazeia ba dadus ne’ebé fó sai husi autoridade protesaun Sivil sira katak,vítima dezastre naturál hahú 2022-2023 hamutuk 139 ho tipu dezastre rai halai,ahi-han uma no anin sobu komunidade nia uma.
Prosesu APC halo verifikasaun hetan estragu ho tipu sira hanesan aat kman 67,aat naton 24 no total vítima dezastre naturál simu ona materiál rekoperasaun hamutuk 47
Dadus Vítima Dezastre naturál iha 2024 hamutuk uma-kain 88 ne’ebé prosesu hela atu hetan materiál rekoperasaun
Jornalista:Celestina Teles
Editór: Florencio Miranda Ximenes
