DILI, 01 Jullu 2025 (TATOLI)—Portavóz Polísia Nasionál Timor-Leste (PNTL), Superintendente Xefe Polísia João Belo dos Reis, hateten Unidade Patrullamentu Fronteira (UPF) ne’ebé destakadu iha fronteira terrestre entre Timor-Leste no Indonézia, konsege asegura joven timoroan na’in-16 ne’ebé tenta ultrapasa ho ilegál fronteira referida ba área Indonézia ne’ebé suspeitadu partisipa seremónia graduasaun ba organizasaun grupu arte marsiál balun.
Iha loron 17 Juñu 2025 tuku 08:00 Otl, UPF asegura uluk sidadaun feto ida ho inisiál ANC, suspeitada fasilita hatama sasán kontra-bandu hanesan atributu arte marsiál balun husi Indonézia mai Timor-Leste no iha loron hanesan iha tuku 21:00 Otl, liuhusi patrullamentu ne’e, UPF konsege asegura joven na’in-16 tanba tenta ultrapasa ho ilegalmente iha fronteira.
“Bainhira ita-nia servisu UPF asegura tiha sidadaun sira ho atributu husi grupu arte marsiál balun, ita halo identifikasaun no kontinua submete ba prosesu investigasaun molok aprezenta ba Ministériu Públiku hodi kontinua halo prosesu tuir lei ne’ebé vigora iha Timor-Leste,” João Belo hateten ba jornalista sira iha nia kna’ar fatin, Komandu Jerál PNTL, Kaikoli, tersa ne’e.
Iha biban ne’e, Komandante João Belo mós informa, iha 25 Juñu 2025, ekipa Unidade Patrullamentu Fronteira ne’ebé destakadu iha Postu Atabae, deteta joven na’in-rua ho motorizada fasilita sidadaun balun hatama sasán kontra-bandu hanesan sigaru Surya hamutuk slop 79 ho ilegál mai Timor-Leste.
“Evidénsia sira kona-ba sasán kontra-bandu ne’ebé Unidade Patrullamentu Fronteira apreende ne’e ita asegura no rejistu hotu aprezenta ona ba Ministériu Públiku hodi kontinua halo prosesu tuir lei ne’ebé vigora iha Timor-Leste,” nia konklui.
Jornalista: Natalino Costa
Editór: Xisto Freitas da Piedade
