Autoridade Uaitame husu MAPPF apoiu ai-moruk peste atake hare
VIKEKE, 03 Jullu 2025 (TATOLI)—Xefe Suku Uaitame, Postu Administrativu Uatulari, Munisípiu Vikeke, Marcelino P. Alves, husu Ministériu Agrikultura Peska, Pekuária no Floresta (MAPPF) apoiu ai-moruk hare nian ba agrikultór tanba daudaun ne’e peste hahú atake agrikultór sira-nia hare.
“Ita-nia agrikultór sira mai hato’o ona bá ha’u katak pesti hahú atake sira-nia hare no ha’u relata ona bá estensionista sira, maibé sira dehan ai-moruk laiha. Entaun, oinsá mak ita bele prevene peste atake komunidade nia hare. Tuir loloos ne’e, tempu hanesan ne’e, ai-moruk iha ona para distribui ba ita-nia agrikultór sira hodi rega ba sira-nia hare. Ho ida-ne’e ami husu MAPPF apoiu ai-moruk ba agrikultór sira,” Xefe Suku Uaitame ba TATOLI, iha suku Uaitame, kinta ne’e.
Tanba ne’e, nia dehan, peste hahú halo hare nia tahan sira komesa mutin, maibé ai-moruk laiha hodi halo intervensaun no prevensaun pesti ne’ebé estraga hare.
Hatán ba preokupasaun ne’e, Diretór Servisu Ministériu Agrikultura Peska, Pekuária no Floresta (SMPPF) Munisípiu Vikeke, Olívio Soares Freitas, hateten peste atake hare kauza husi klima (udan).
“Ita iha ai-moruk ba prevensaun, maibé uitoan de’it hodi halo antisipasaun. Tanba ita tinan ida-ne’e, ai-moruk sei prosesu iha konkursu nia laran, nune’e seidauk distribui mai Munisípiu Vikeke. Ita haree peste ne’ebé atake hare mak barboleta mutin ho sira seluk. Ita sei halo akompañamentu ba agrikultór sira,” nia tenik.
Jornalista: Vitorino Lopes da Costa
Editór: Xisto Freistas da Piedade
