Estrada bá Haenaudere grave, difikulta EBC 09 Haenaudere implementa PME
VIKEKE, 03 Jullu 2025 (TATOLI)—Diretór Ensinu Báziku Sentrál (EBC-sigla portugeza) 09 Haenaudere, Suku Afaloikai, Postu Administrativu Uatulari, Munisípiu Vikeke, Delfin Sarmento, informa kondisaun estrada husi diresaun Bebui to’o área Haenaudere ne’ebé lokaliza iha foho daudaun ne’e kondisuan grave hodi difikulta EBC 09 Haenaudere implementa Programa Merenda Eskolár (PME).
“Kondisaun estrada ne’ebé liga ba ami-nia eskola EBC 09 Haenaudere ne’e aat tebetebes, difikulta ami lori sasán merenda eskolár. Nune’e, ami implementa programa merenda eskolár la tuir menu ne’ebé parte edukasaun no saúde oferese ba ami,” Delfin Sarmento ba jornalista sira, iha Liaside, Uatulari, kinta ne’e.
Delfin hatutan, dalaruma produtu PME lori sa’e bá eskola tenke selu ema no selu ema kuda mak foin lalin sasán ba to’o iha eskola tanba estrada aat.
“Tan ne’e, ami implementa PME la’o tuir situasaun de’it. Produtu ne’ebé fornese ba programa PME husi Uatulari mak lori bá EBC 09 Haenaudere. Ho dezafiu sira-ne’e oferese ai-han programa merenda eskolár tuir de’it situasaun. Alende ne’e, ami-nia materiál eskola nian mós ami lori bá eskola labele tanba kondisaun estrada referida,” nia hato’o.
Aleinde ne’e, Sarmento tenik, mate ruma iha Uatulari atu lori sa’e mai foho mós difikulta hotu, inklui mós transporta moras sira-ne’ebé iha foho bá fasilidade saúde.
Ho kondisaun estrada ne’e, nia husu ministériu relevante fó atensaun ba estrada, nune’e labele difikulta servisu edukasaun no komunidade sira-ne’ebé hela iha foho. Estrada husi mota Bebui, Afalokai, to’o área Haenaudere purvolta kilométru 31.
“Ami hakarak husu ba Ministériu Obra Públiku hadi’a ami-nia estrada hodi fasilita ami. Tanba estrada referida aat kuaze tinan barak ona, maibé Governu seidauk tau-atensaun,” nia propoin.
Tuir dadus, estudante EBC 09 Haenaudere hamutuk na’in-420 no totál profesór ne’ebé hanorin ativu hamutuk na’in-11.
Jornalista: Vitorino Lopes da Costa
Editór: Xisto Freitas da Piedade
