DILI, 03 Jullu 2025 (TATOLI)—Diretór Administrasaun Finansa Lojistika no Aprovizionamentu, Clementino da Costa, hateten tempu badak Hospitál Nasionál Guido Valadares (HNGV) sei instala CCTV iha áreadór ospitál nian, nune’e bele asegura ekipamentu iha HNGV.
“Atu monta CCTV iha ospitál Nasionál Guido Valadares para bele kontrolu servisu hotu-hotu kona-ba ekipamentu hodi asegura ekipamentu medikamentu sira-ne’ebé iha HNGV. Daudaun ne’e iha ona prosesu aprovizionamentu no halo ona avaliasaun dokumentu ba iha prosesu kompra CCTV, tanba ne’e iha tempu badak ita bele hetan manán-na’in ida para oferese CCTV dijitál atu bele instala iha HNGV,” Clementino da Costa informa ba jornalista sira iha nia kna’ar fatin HNGV, ohin.
Nia dehan, totál Orsamentu Jerál Estadu ne’ebé sira aloka ba iha CCTV ne’e hamutuk rihun $20, maibé ida-ne’e bazeia ba proposta ne’ebé aprezenta husi empreza manán-na’in mai iha HNGV.
“Fundu ne’ebé ita prevee ba iha ne’ebá tuir orsamentu alokadu ba iha atividade ida-ne’e sosa CCTV ne’e iha rihun $20, maibé depende ba iha proposta ne’ebé mak aprezenta mai husi empreza hodi bele mai haree. Katak, empreza ne’ebé submete proporsál ho nia orsamentu ho nia estimasaun sira-ne’e atu kompra,” nia relata.
Nia afirma, alvu ne’ebé HNGV atu instala CCTV hamutuk 20- resin ba fatin sira-ne’ebé identifikadu ona mak hanesan iha farmasia fatin ne’ebé rai ekipamentu medikamentu sira, iha ospitál kotuk, iha áreadór ospitál nian, estasionamentu sira hodi kontrola movimentu funsionáriu HNGV rasik no mós vizitante sira mai iha HNGV,” nia dehan.
Tuir nia, dezde harii Ospitál Nasionál Guido Valadares to’o agora seidauk instala CCTV, tanba ne’e Konsellu Diretivu iha ona planu no tempu badak sei instala CCTV iha HNGV.
“Durante ne’e CCTV iha Hospitál Nasionál Guido Valadares seidauk iha, tanba ne’e mak aumezmu tempu iha mós rekomendasaun husi Parlamentu Nasionál, se bele atu monta CCTV atu bele kontrola situasaun hotu iha ospitál ne’ebé durante ne’e seidauk iha. Foin mak loke prosesu, karik iha tempu badak ita bele hetan vensedór ida hodi bele fornese CCTV mai iha HNGV,” nia esplika.
Jornalista : Felicidade Ximenes
Editór : Cancio Ximenes
