Komunidade Luka husu ekipa toponímia halo operasaun ba animál
VIKEKE, 03 Jullu 2025 (TATOLI)—Komunidade husi Suku Luka, Postu Vikeke Vila, Munisípiu Vikeke, Leonito Gomes Pereira, husu ekipa toponímia Munisípiu Vikeke hodi halo operasaun ba animál sira-ne’ebé kontinua livre iha Suku Luka tanba estraga komunidade nia ai-han.
“Ami husu ba ekipa toponímia sira, se bele halo halo operasaun ba animál sira iha suku Luka ne’ebé husik livre barak liu. Agora daudaun ami hasoru hela problema animál ne’ebé tama ami-nia natar ho livremente. Horsehik ami rezolve ona. Agora, animál nia na’in sira dehan ba ami katak sira-nia animál husik de’it, ne’ebé natar na’in sira mak tenke halo lutu. Maibé, lei bandu ema labele husik balada sira husik livre hodi estraga komunidade nia natar no toos,” Leonito Gomes Pereira ba jornalista sira, iha Suku Luka, kuarta ne’e.
Leonito aprofunda, autoridade Munisípiu Vikeke hasai ona karta sirkulár hodi komunidade labele husik balada livre.
“Karta sikulár fó-sai ona, maibé ema kontinua husik livre. Tan ne’e, ami husu ekipa operasaun sira mai to’o suku hodi atua balada livre sira,” nia hato’o.
Iha biban ne’e, Xefe Suku Luka, Manuel Gomes, husu komunidade Luka sulan animál, labele husik livre hodi estraga ema-nia toos no natar sira.
“Ohin loron ita-nia grikultór sira halo ona natar. Ne’ebé, ha’u husu ba ita-boot sira labele husik animál livre tanba Suku Luka ne’e natar no toos barak,” autoridade ne’e aviza ba komunidade.
Iha biban ne’e, Administradór Postu Vikeke Vila, Leopoldo da C. Alves, haktuir daudaun ne’e karta sikulár sai ona no distribui hotu ona ba suku sanulu (10) iha Postu Vikeke Vila, tan ne’e tenke kumpre hodi labele husik balada sira livre.
Iha sorin seluk, Komadante Polísia Nasionál Timor Leste, Eskuadra Postu Vikeke Vila, Inspetór Polísia, Venseslau Moreira de Oliveira Freitas, hateten balada ne’ebé husik livre barak liu ne’e iha Suku Luka no Suku Bibileo, tan ne’e PNTL sei hamutuk ho ekipa operasaun sira hodi haree asuntu ne’e.
Tuir dadus, populasaun Suku Luka totál hamutuk 2.395. Husi númeru ne’e, agrikultór hamutuk 683 kompostu husi Aldeia Kanlor, Uma-Boot, Iramer no Umalor.
Jornalista: Vitorino Lopes da Costa
Editór: Xisto Freitas da Piedade
