VIKEKE, 04 Jullu 2025 (TATOLI)—Komisaun Antí Korrupsaun (CAC-sigla portugeza) halo inspesaun iha Munisípiu Vikeke identifika irregularidade lima iha implementasaun projetu lima iha Munisípiu Vikeke.
Tuir ekipa prevensaun kriminál CAC lideradu husi Komisáriu Adjuntu Servisu Apoiu no Kooperasaun, Miguel Faria, relata, kona-ba rezultadu inspesaun ne’ebé ekipa CAC sira halo durante loron rua iha Munisípiu Vikeke konsege identifika irregularidade sira-ne’ebé mosu iha implementasaun obra projetu sira.
“Bazeia ami-nia inspesaun iha terrenu, ekipa relata katak mosu iregularidade lubuk ida. Iha projetu lima ne’ebé pendente/abandonadu husi kompañia sira,” Miguel Faria dehan hafoin sorumutu ho Autoridade Munisípiu Vikeke, sesta ne’e.
Nia dehan, entre irregularidade ne’ebé iha, balun bele rezolve imediatamente husi parte autoridade no balun CAC sei halo pedidu ba parte relevante sira hodi rekolla dadus informasaun no sei bolu xamada atensaun ba empreza sira hodibele responde no rezolve irregularidade referida.
“Bainhira la koopera ho ami, CAC sei submete relatóriu sira ba parte investigasaun kriminál nian, hodi kontinua ba prosesu avestigasaun tuir lei ne’ebé vigór. Tanba ne’e, CAC iha papél ida atu kontrolu no ajuda autoridade Estadu nian hodi aselera prosesu dezenvolvimentu no boa governasaun,” nia hato’o.
Iha fatin hanesan, Prezidente Autoridade Munisipál Vikeke, Francisco C. S de Gonzaga Soares, hato’o agradesimentu ba prezensa CAC tanba bele ajuda ona autoridade identifika irregularidade hirak-ne’ebé akontese, no nafatin rekomenda ba parte CAC atu halo inspesaun mós projetu balun ne’ebé pendente no abandona husi kompañia responsavel sira.
“Ha’u hato’o agradesimentu ba CAC ninia prezensa iha Munisípiu Vikeke hodi halo inspesaun ba projetu sira. Ha’u nafatin rekomenda ba CAC kontinua halo inspesaun ba projetu sira-ne’ebé empreza sira abandona iha Munisípiu Vikeke,” nia hateten.
Tuir dadus, projetu lima ne’ebé abandonadu mak hanesan projetu reabilitasaun estrada husi Meabuti (Suku Matahoi) to’o Sapatula, Postu Uatulari, Projetu instalasaun liña eletrisidade iha área Lawai, projetu konstrusaun irrigasaun iha Suku Matahoi, projetu konstrusaun fatin restu mortál iha Suku Uma Uain Leten, Postu Vikeke Vila no Postu Uatulari no projetu manutensaun edifísiu sira Ministériu Finansa nian iha Munisípiu Vikeke.
Jornalista: Vitorino Lopes da Costa
Editór: Xisto Freistas da Piedade
