Empreza ‘Bere Is Back’ normaliza estrada aat husi Kampung Baru to’o Nunumalau
VIKEKE, 04 Jullu 2025 (TATOLI)—Enjiñeiru husi Empeza Bere Is Back, Andre da Costa Tavares, informa empreza ho inisiativa rasik normaliza estrada husi Kampung Baru, Uatulari Antiga nian to’o área Nunumalau tanba daudaun ne’e kondisaun estrada aat hodi difikulta movimentu transporte sira.
“Ami foti inisiativa normaliza estrada referida. Estrada aat kauza husi klima (udan),” Andre da Costa Tavares ba jornalista sira, iha Suku Babulu, Postu Administrativu Uatulari, Munisípiu Vikeke, sesta ne’e.
Iha normalizasaun ne’e, Andre haktuir, empreza ateru estrada ko’ak sira, nune’e labele difikulta movimentu transporte sira.
“Ha’u sente estrada husi Kampung Baru to’o Nunumalau ne’e Governu presiza tau emerjénsia ruma nune’e bele atinje kualidade obra ba longu prazu,” nia sujere.
Estrada ne’e, nia dehan, komunidade husi suku ualu (8) ne’ebé eziste iha Postu Administrativu Uatulari asesu hotu, tanba komunidade sira maioria nian knua iha foho Matebian, entaun sira tenke liuhusi dalan ne’e.
Notísia relevante: Kondisaun estrada liga bá Uatukarbau grave, difikulta implementasaun programa PNDS
Iha fatin hanesan, abitante Suku Babulu, Jeferino Fernandes, haktuir, kondisaun estrada ne’e difikulta tebes transporte liuliu karreta sira tanba tahu nakonu rezulta karreta sira liu dalan ne’e sempre mout no ema tenke dada mak foin bele liu.
“Ami husu ba Governu atu hadi’a estrada ne’e, atu fasilita movimentu sira liuliu negosiante sira-ne’ebé fa’an sasán ho karreta sira no fasilita moras emerjénsia no inan isin-rua hodi hakbesik bá fasilidade saúde,” nia hato’o.
Tuir observasaun jornalista TATOLI, kondisaun estrada diresaun husi Kampung Baru to’o Nunumalau, Suku Afaloikai, Postu Uatulari, purvolta kilómetru 11 ne’ebé nakonu ho tahu no iha pontu-hitu sai grave maka’as ne’ebé sempre difikulta movimentu transporte sira atu ultrapasa.
Jornalista: Vitorino Lopes da Costa
Editór: Xisto Freistas da Piedade
