Governu sei harii ospitál munisípál estandar internasionál iha Manufahi-Ermera
DILI, 04 Jullu 2025 (TATOLI)—Governu liuhusi Ministériu Saúde sei hariihospitál munisípal ho estandar internasionál iha munisípiu Manufahi no Ermera.
Ministra Saúde, Élia dos Reis Amaral, hatete bazeia ba kompromisiu eleitorál katak sei harii hospitál uma andar 10, tanba ne’e Ministériu Saúde prevee Orsamentu Jerál Estadu totál millaun $18 atu harii ospitál estandar internasional andar 10 iha munisípiu rua ne’e.
“Bazeia ba uma andar 10 ne’e, ita hatene katak téknikamente, ita-nia rai halai, la’ós hotu-hotu maibé iha rai balun ke halai. Ha’u la’os téknika ba iha rai nian, maibé tuir kolega sira-nia esplikasaun iha Konsellu Ministru sempre informa. Entaun, saida mak Ministériu Saúde hala’o ho ekipa MPIE, husi CNA no mós ADN, entaun iha ne’ebá ita haree ona katak ita prevene ona Orsamentu Jerál Estadu 2025 totál millaun $18, atu halo ba ospitál dahuluk ospitál munisípal iha Same, área luak nia ne’ebá mak atu entrega mai Ministériu Saúde. Depois, daruak iha Munisípiu Ermera, Dukurai tanba ne’e ita kordena ho populasaun iha ne’ebá no aloka ona osan atu harii ospitál ne’e rasik. No, ida iha Gleno tuir dezeñu ne’ebé iha,” Elia dos Reis hateten ba jornalista sira, kinta ne’e.
Nia dehan, ida-ne’e kompromisu Governu Konstitusionál da-sia (IX) nian iha tempu eleitorál hatete katak ospitál andar 10 iha faze tentativa, bazeia ba iha dezeñu ne’e rasik.
“Ba iha kompromisiu nonu Governu iha komprimisiu eleitorál hatete dehan andar 10 iha faze dezeñu tentativa bazeia ba iha dezeñu rasik, ha’u dehan tentativa siginifika bele andar haat iha Same, bele andar tolu iha Dukurai, bele andar tolu iha Gleno, ne’e tentativa dezeñu signifika iha 10 andar, ne’e kompromisu husi nonu governu ho Primeiru Ministru Kay Rala Xanana Gusmão ne’ebé la bele iha duvidas, tanba ne’e hospitál Munisípal maibé ho estandar internasionál,” nia hateten.
Nune’e, Ministra Saúde simu dokumentu ba rai ne’ebé sei utiliza hodi halo konstrusaun ba ospitál munisipál ho estandar Internasionál husi Administradór Postu Administrativu Letefoho, Vicente Maria de Deus iha Salaun Enkontru Gabinete Ministra, Palácio das Cinzas, iha Kaikoli, Dili..
Ministra Saúde hato’o agradesementu ba komunidade sira no mós Administradór Postu Administrativu Letefoho ne’ebé ho vontade tomak mai entrega rai ne’ebé sei utiliza hodi konstrui ospitál Munisipál ho estandar Internasionál, bazeia ba planu no programa Governu da-sia (IX) nian.
Objetivu entrega rai ne’e atu konstrui ba futuru ospitál Munisipál iha Postu Administrativu Letefoho. Rai ne’ebé entrega lokaliza iha Suku Dukurai hamutuk ho Suku Eraulo no Goulolo, no planu atu harii ospitál munisipál agora iha ona prosesu dezeñu no hetan ona aseitasaun husi rai-na’in sira ho totál orsamentu millaun $18.
Tuir planu, iha tempu besik Primeiru-Ministru RDTL, Kay Rala Xanana Gusmão, hamutuk ho dirijente másimu Ministériu Saúde nian, sei hala’o lansamentu fatuk dahuluk ba konstrusaun refere.
Marka prezensa iha atribuisaun rai ne’e mak, Prezidente Komisaun Funsaun Públika, Agustinho Letêncio de Deus, Diretór Jerál ba Servisu Koperativu Valentino Lisboa Marçal no Diretora Jerál Unidade Jestaun Projetu Saúde, Adelia Maria Moniz Bareto.
Jornalista : Felicidade Ximenes
Editór : Cancio Ximenes
