VIKEKE, 04 Jullu 2025 (TATOLI)—Komunidade Suku Luka, Postu Administrativu Vikeke Vila, Munisípiu Vikeke, husu Ministériu Obra Públika (MOP) atu rekonstrui ponte Uelelo tanba durante ne’e difikulta komunidade nia movimentu.
Abitante Aldeia Uma-Boot, Mariano Mendonça, haktuir, mota Uelelo uluk ponte iha maibé aat ona, nune’e agora difikulta tebes movimentu sira.
“Tan ne’e, ami husu ba Autoridade Munisípiu Vikeke hodi tau-matan ba ami-nia ponte Uelolo. Tanba ami haree autoridade sira-nia planu ne’e ponte Uelolo kontinua tama ba planu prioridade. Tan ne’e mak ha’u husu ba autoridade atu tau-matan ba ponte ne’e atu komunidade asesu no ami mós husu Ministériu Obra Públika katak prosesu rekonstrusaun ponte Uelolo ne’e to’o iha-ne’ebé ona,” Mariano Mendonça ba jornalista sira, iha Suku Luka, sesta ne’e.
Nia dehan, área ponte sorin hanesan Aldeia Uma-Boot Uefia rai poténsia ba setór agrikultura, maibé ponte liga bá ne’ebá laiha, ida-ne’e sai difikuldade ba komunidade.
Hatán ba preokupasaun ne’e, reprezentante Prezidente Autoridade Munisípiu Vikeke, Luís António da Silva Soares, haktuir, kona-ba ponte Uelolo, Prezidente Autoridade Munisípiu (PAM) Vikeke la taka matan ba komunidade nia preokupasaun.
“Kona-ba ponte Uelolo ita-nia PAM rasik hato’o ona bá Ministériu Obra Públika. Tanba, ponte ne’e, tama ba planu nasionál, ne’e duni autoridade munisípiu labele foti desizaun ruma. Nune’e, ha’u hanoin, ida-ne’e mós Governu tau ona iha planu,” nia tenik.
Iha fatin hanesan, Administradór Postu Vikeke Vila, Leopoldo da C. Alves, hateten ponte Uelolo tama ba grande projetu nune’e iha tempu badak Ministru Obra Públika sei mai hodi haree ponte referidu.
Fó hanoin fali katak iha fulan-Outubru 2023, Ministériu Obra Públika (MOP) orienta ona Empreza JONIZE Unipessoal, Lda hodi sobu ona ponte Uelolo no promete ba abitante sira katak dentru fulan tolu sei konstrui fali ponte foun maibé to’o agora ponte seidauk eziste.
Jornalista: Vitorino Lopes da Costa
Editór: Xisto Freistas da Piedade
